Nongpoh, Risaw 27 : Ka Weavers Service Centre, Guwahati kala plie hynne ka sngi Thohdieng ia ka Iew pyni nam ia ki jain ryndia bala thain hi ha Meghalaya bad ki Jylla ba marjan, kaba la pynlong ha madan NSCA, Pahamsyiem.
Ia kane ka iew pyni nam bala tip kum ka District Handloom Expo ‘Tana-Bana’ la bei tyngka da ka Ministry of Textile ka Sorkar India.
Ha kane ka iew, la wan ban iashimbynta da ki nongthain jain na kylleng ka Jylla Meghalaya, Assam bad kumjuh ruh na Sikkim. Kane ka Iew kala sdang hynne ka sngi Thohdieng bad kan kut ha ka 31 tarik u Risaw bad kane ka Iew kala thaba da ki jait jaiñ ryndia bapher bapher kiba la shna bad pynwandur haka rukom kaba itynnad bad khring ïaki paidbah, nalor kiwei ki tiar thaiñ bad ki tiar shna kti.
Ïa katei ka ïew pyni nam la plie paidbah da MLA ka Nongpoh Bah Mayral Born Syiem haka jingdonlang ka Niva Kalita Dipika Ingdo, Zonal Officer Weaving Shillong, Babai Nath Technical Superintendent Wevers Service Center Guwahati, Kong D Lyngdoh Zonal Officer naka tnad Textile ka sorkar jylla, Bah Mathew Makdoh Working President NSCA, DK Srivastava Superintendent KVIC Shillong bad kiwei kiwei.
Haba ai jingkren, u Bah Mayral Born u la ai ka jingïaroh ïaka Weavers Service Center kaba la shim ïaka sienjam ban pynlong kum katei ka jait prokram ban kyntiew ïaki nongthaiñ jaiñ haka jylla bad da ka jingsngew sarong lah ban ong ba ka Ri-Bhoi District ka dei kaba lamkhmat khamtam ka thaiñ nongtluh ba bun hi ki longiing ki dei kiba nang ban thaiñ ban wet kaba ioh nam ruh kum ka Eri Silk Village hapoh ka jylla.
