Boko, Naitung 02 : Ka kynhun sorjamin, ki bor District ka Assam bad Meghalaya kila iapoi lang ha ka thain Hahim, Boko, kaba hap hapoh ka Kamrup District ha ka sngi Ba-ar bad kila iasdang ban iasieh ia u mawpud haki jaka bala dep iapynbeit ia ka jingiakajia pud, hapdeng ki artylli ki Jylla.
Ka jingiasieh mawpud kala sdang naka wah Gijang napoh ka shnong Rangthali ha Hahim. Kila don bun ki jingiakajia halor u pud u sam ha kane ka thain naduh ba iaphiah ia ka Meghalaya bad Assam ha u snem 1971.
Ia une u pud jong ki jaka ba iakajia la ithuh bad dep pynbeit hapoh ka jingialam u Myntri Rangbah ka Assam Himanta Biswa Sarma bad u Myntri Rangbah ka Meghalaya Conrad K Sangma.
Hadien ki jingiakren kiba bun bala pynlong hapdeng ki bor District, ki Myntri Sorkar bad ki Heh Ophisar na baroh ar Jylla, 12 tylli ki jaka hapdeng kine ki ar jylla la ithuh kum ki jaka ba iakajia bad hynriew tylli lah dep ban iapynbeit ha ka wat iapynbeit pud ba nyngkong, ha ka 29 tarik Lber 2022, kaba kynthup ia ka Tarabari, Gizang, Hahim, Boklapara, Khanapara-Pilangkata, bad Ratacherra.
Ki arngut ki Myntri Rangbah kila iashong jingialang ha ka 2 tari Jylliew bad rai ban pynieng noh ia u mawpud ha kine ki jaka kiba ladep iapynbeit. Ki Myntri Rangbah kila pynbna ba ia ki kam baroh ha kine ki hynriew tylli ki jaka bala dep pynbet, yn sa pyndep noh hashuwa ka jingrakhe ia ka Independence Day mynta u snem.
Ki nongshongshnong kila iaroh ia ki sienjam bala shim da ki Sorkar na baroh ar Jylla bad ong ba ka jingpynieng ia u mawpud ka dei ka khyllipmat ka ban sah jingkynmaw shirta.
Ka jingsieh ia u mawpud kala sdang na ka shnong Rangthali ha Hahim, Umshek (Mathapota), Maspara, Malapara kiba don markhap ka wah Gijang bad ruh ha Ranighar, Salpara kibadon markhap ka wah Tirchang, Thutia Bazaar ba marjan ka Iew Hahim bad kan kut ha Rangsapara hadien ka shnong Athiabari kiba don hajan ka wah Tirchang.
Ka kynhun sorjamin na baroh artylli ki Jylla kin sa sdang ruh ban sorjamin ia ka thain Gijang bad ban pynieng noh shen ia u mawpud.
