Sdang ka HYC ia ka jingialap ba iada ia ka Khyndailad | Dawa ban tei ia ka Cultural Centre

Shillong, Lber 26: Ka Hynniewtrep Youths’ Council (HYC) ha ka step sngi Palei, ka la sdang ban sam ïa ki kot lyngkdop ha kylleng ka nongbah Shillong kum shi bynta ban pynbor ïa ka Sorkar ba kan shna ïa ka Khyndailad Cultural Centre, da kaba maham ba kane ka jaka pdeng jong ka nongbah Shillong ka don ha ka jingma ban duh noh ïa ka jinglong tynrai jong ka.

Hapoh ka lama “Save Khyndailad, Save Our Identity – Ïm Ka Kyrteng, Sah Ka Nam,” ka kot lyngkdop ka batai ïa ka Khyndailad ym tang kum ka jaka khaii pateng hynrei kum ka dohnud ba don ia ka histori jong ka nongbah Shillong bad ka dak jong ka jinglong Khasi, ka kolshor bad ka jingim ki paidbah.

Ka long kaba sngewsih mynta ba ka Khyndailad kam don “ka jaka na ka bynta ki nongrwai tynrai, kam don ka rynsan ban pyninam ia ki jingbam bad ki kam shna jingshna tynrai, kam don ka shlem jingtip tynrai shaphang ka pateng na ka bynta ki nongjngohkai bad ki samla, bad kam don ka jingithuh ia ka jingmut jong ka ha ka histori.

“Lada ka Khyndailad ka duh noh ia la ka jong ka jingihuh tynrai, ka Shillong ruh ka duh noh ia ka jingsah jingkynmaw” la ong ka kot lyngkdop.

Ka jingdawa jong ka HYC ka long ba ka Sorkar ka dei ban shna mardor ïa ka Khyndailad Cultural Centre kaba don ka open performance arena kaba plie lad na ka bynta ki nongrwai Khasi, Jaiñtia bad Garo, ki stall na ka bynta ki jingbam tynrai bad ki kam shna jingshna tynrai, ka jaka pyni ïa ki jingtei tynrai, bad ki jingshna jingtei kiba pynpaw ïa ki riti dustur jong ka thaiñ.

Ka HYC kala kynthoh ba kane ka jingleh ka dei ban kyntiew haka ioh kam ioh jam kumjuh ruh shaphang ka kolshor.

“Ka kolshor lada la thmu bad pyntreikam bha kam dei tang ka jingpynitynnad hynrei ka dei ka ioh ka kot,” la thoh ha ka kot lyngkdop.

“Kane ka centre kan thaw lad kamai jakpoh ïa ki nongdro dur, ki nongdie marbam, ki nongshna tiar bad ki samla nongseng kam seng jam.” kala ong.

Ka kot lyngkdop ka buh ruh ia ka jingdawa kum ka riti synshar bad ong, “Ka jingpynneh pynsah ia ka kolshor ka dei ka kamram jong jong ka Sorkar Jylla bad ka jingroi khlem ka jingithuh ka dei ka jingpynjot.”

Ka HYC ka kyntu ia ka sorkar ban mang pisa, ban pynkhreh ia ka detailed project report, ban ithuh bad pynskhem ia ka jaka, ban iamir jingmut bad ki nongshim bynta trai ri, bad ban sdang ia ka jingtei hapoh ka por ba la buh.

Ka la ong ba kan pynlong ia ki jingiakhih, ki jingialang paidbah, ki signature campaigns bad ban leit sha ki samla, ki nongdro dur, ki dorbar shnong, bad kiwei kiwei ki nongshong shnong kiba sngewkhia.

“Ngin nym sngap jar tad haduh ba ka Khyndailad Cultural Centre kan long ka jingshisha”, ka la pynbna.

“Kane kam dei ka jingdawa politik hynrei ka dei ka jingdawa jong ki trai ri trai muluk ka Jylla.”

Na ka bynta ka HYC, ka jingpynthymmai biang iaka Khyndailad ka dei kaba la teh bad ka jingïada ïa ka jinglong kyrpang. “Ka jaitbynriew khlem ki jaka kolshor ki long ki bym lah ban iohi ha la ka jong ka ri.”

“Ngi khot ia uwei pa uwei u riewlum khamtam bad ia baroh ki nongshong shnong kiba sngewkhia iala ka jong ka Jylla ban kyrshan ia ka jingdawa jong ngi,”.