Nongstoin, Nohprah 21: Ka Green Tech Foundation Meghalaya (GTFM) hynne ka sngi Palei, kala sdang ia ka project ban pynkhuid ia ki jaboh jabain ha ka Wah Nonbah.
Kane ka jingpynkhuid ia ka Wah kala ioh ruh ia ka jingiatreilang na ka Latynrai Cooperatie Society ka West Khasi Hills bad ki katto katne ki Seng Samla ka Shnong New Nongstoin.
Kine ki kynhun kila sdang ban tam ia ki jaboh jabain na ka jaka bala den da ka jar ban pyllang ia ki niut kiba tuid ba kynthup naduh ki bilor, ki plastic, ki jain jot bad kiwei kiwei, koba la wan kit da ka um bad sahkut ha kane ka jar.
Hashuwa ban sdang kane ka jingpynkhuid, ka GTFM kala pynlong ia ka jingpynshai paidbah halor ka jingkongsan bad jingkordor ka mariang bad ka sawdong sawkun kaba khuid ba suba ia ka koit ka khiah u paidbah.
U President ka GTFM Bah H Ban Nonglang ula ai ka jingpynshai kaba bniah bha shaphang ka lehkhuid lehsuba bad ban sumar ia ki wah bad ki tyllong um. Ula pan ruh ia ka jingiatrei na ki paid nongshongshnong bad ki nongleit nongwan ba kin sangeh noh shisyndon ia ka jingbret pathar ia ki jabon jabain ha ki wah.
