Pynkhreh u Bah Bormanding їa ka election MDC na Rambrai-Jyrngam
Nongstoiñ, Naiwieng 19: Watla ka election MP & MDC ka dang sah da ki bnai ba kan wan, ka Meghalaya Pradesh Congress Committee kala sdang ia ki jingpynkhreh ia kine ki elekshon da kaba pynlong ia ki jingialang paidbah ban pynkhlain bad pynsuhthied ia ka party.
Ka Congress ha ka sngi saitjain bala lah, kala sdang ia ka jingialang paidbah ba nyngkong ha Langja ia kaba la pyniaid da ka Rambrai Jyrngam Block Congress Committee.
U MP ka Shillong Bah Vincent H Pala u ba dei ruh u president ka Meghalaya Pradesh Congress Committee, la pyntip ba un wan ban їadon ryngkat ha kane ka jingialang, hynrei na ki daw bym lah kiar utei u MP um shym lah shuh ban wan.
Ia kane ka jingialang la pyniaid da u bah K.P Lyngkhoi president ka Congress Rimuliang zone, ha ryngkat ka jingїadonlang jong ki nongїalam ba hakhmat jong ka Congress na ka jylla, ba kynthup їa u bah Charles Marngar MLA ka Mawhati constituency, u bah Emanuel Badwar secretary ka MPCC Youth wing.
Ha kane ka sngi, ka RJBCC kala pyntip ruh ba u bah Bormanding Nonglang President ka West Khasi Hills District Congress Committee ba un long u kyrtong MDC na ka Rambrai Jyrngam constituency ha ka MDC election ban wan.
Ha katei ka sngi la їoh ruh ban pynskhem їa ki nongkitkam jong ka Rimuliang Mahila ba kynthup їa ka kong Haimilis Nongsiej kum ka president ryngkat kiwei pat ki nongkitkam. La pdiang burom їa ki longkmie kiba dei ki nongkyrshan ba radbah jong u kyrtong shimet jong ka Rambrai Jyrngam ha ka election MLA ba la dep, kiba la wan ban pynїasoh bad ka Congress ba kynthup їa ka kong Joy Marweiñ na Mawphansyiar bad ki nongbud jong ka bad la pynskhem їa ki da u bah Charles Marngar.
