Shillong Naitung 23: Ka Meghalaya Legislative Assembly ryngkat ka jingioatreilang bad ka Forest Department hynne ka sngi Balang, kila pynlong ia ka jingthung dieng ha ka phyllaw jong ka iingdorbar bathymmai ka jylla kaba don ha New Shillong Township, Mawdiangdiang.
Ha kane ka prokram la wan ban iashimbynta da u Lat ka jylla u Chandrashekhar H Vijayashankar, u Myntri Rangbah ka jylla Conrad K. Sangma, u Lamphang ka iingdorbar u Thomas A. Sangma, u Symbud Myntri Rangbah ka jylla u Bah Prestone Tynsong, u Symbud Lamphang u Timothy D Shira, ki Myntri Sorkar kiba kynthup ia u Rakkam A Sangma, Marcuise N Marak, ka Dr M Ampareen Lyngdoh, u AT Mondal, u Opposition Chief Whip Bah Ronnie V Lyngdoh bad ki MLA na ki seng sain pyrthei bapher bapher.
Haba kren ha ka jingialang u Lat ka jylla ula iaroh ia ka rukom pynwandur ia kane ka iingdorbar kaba thymmai bad ula iaroh ruh sienjam ban thung ia ki dieng ha kane ka jaka.
Ula banjur ia ka jingkongsan ban thung ia ki dieng tynraik iba mih hi na kane ka jylla, ki kynbat jingthung bad ia ki bynta kiba la jan duhjait, ha ryngkat bad ka maham ruh ia ka jingthung tang ia shi jait u jingthung ha kawei ka jaka namar ka lah ban ktah ia ka sawdong sawkun.
Ula khot ruh ia ka jylla Meghalaya kum ka “Bneng ha India,” bad u Lat ula pynkynmaw ruh ia kane ka jingialang ia ka jingdon kyrpang jong ka jylla ia ki jingdon jingem ia ki spah jong ka mariang bad ia ka jingkongsan ban pynneh pynsah ia ki. “Kaei ka kamram ka jong ngi, kadei ban wanrah biang ia ka jingling jingman kaba binag ha ka sawdong sawkun jong ka mei mariang? ula kyntu ba donkam ban don ia ka jingiatreilang.
Katba u Lamphang u Thomas A Sangma, ula banjur ba kane ka jingthung dieng ka long kum ka dak jongka jingiatylli lang ban don ia ka jingkut jingmut kaba skhem ban iada ia ka mariang.
Ula pynbna bai a ki dieng kiba la thung mynta ka sngi da ki heh ki hain yn sab uh ryngkat bad ia ka kyrteng ka jongki kaban pyni ia ka jingbat skhem ia ka jingkular ban pynlong ia ka Meghalaya kaba jyrngam.
“Ka Assembly complex kaba thymmai kadei kaba la pynwandur ym tang ka dak jong ka jaka ban pynlong ia ka dorbar, hynrei kaba jyrngam, kaba don ia ka jaka kaban neh kiban pynmih ia ki jingsawa kiba kordor jong ka sawdong sawkun jong ka mariang” ula ong.
U Myntri Rangbah ka jylla u Conrad K Sangma ula ong ba kane ka jingthung dieng kadei kaban sah jingkynmaw ha ka histori bad ka jingleh kaba don jingmut, kaba iaid ryngkat bad ka jingiakhun ka pyrthei pyrshah ia ka jingkylla ka suinbneng.
Ula pynkynmaw ia ka jingkren na ka phlim Gladiator: “Kaei kaba ngi leh mynta kan iai sawa shi junom” bad ka ong ba ki dieng kiba la thung mynta ka sngi kin ieng kum ka jingsahnam na ka bynta ki pateng ban dang wan.
Ula pynpaw ruh ia ka jingseisoh ka jylla lyngba ka jingshim ia ka sienjam lyngba ka One Citizen One Tree, kaba la lam ia ka jingthung ia ki dieng kaba la jan kot ia ka 2 klur tylli ki dieng ha kylleng ka jylla Meghalaya.
U Myntri Rangbah ula kyntu ia baroh ki MLA ba kin leit man la ka por ban sumar sukher ia ki dieng kiba kila thung, ban pynskhem ia ka khubor ia ka jingling trai ia ka mariang bad ia ka jingkitkhlieh kaba shimet nalade.
