Shillong, Naitung 23 : U President ka Voice of the People Party (VPP) Bah Ardent M Basaiawmoit ha ka sngi Ba-ar ula iathuh ba ka party kala sdang ban iuhkjat ha Ri-lum Garo.
Hynrei ula ong pat ba ka VPP kam pat kyrkieh satia ban sei kyrtong ha kaban iakhun ia ka elekshon shiteng samoi ha Gambegre.
Haba iakren bad ki nongthoh khubor, u Bah Ardent ula ong “Ngi la sdang ban leit iuhkjat ha Ri-lum Garo”.
“Ki don ki briew, kila pynpaw ia ka jingkwah ban iakhun ia ka elekshon shiteng samoi ka Gambegre na ka ticket ka VPP hynrei kum ka party ngi la rai ba ngin nym pat rai kyrkieh halor kane ka kam lada ngi kwah ban ioh ia ka jingkyrshan ba pura jong ki paidbah ka Ri-lum Garo” ula ong.
Haba pynpaw ba shen ka Party kan sa pynlong ia ka jingiasyllok ha Ri-lum Garo, une u President ka VPP ula ong “Ha ka jingshisha, nga dang thmu ban leit iuhkjat ha Ri-lum Garo hapoh une u bnai hynrei nga la pynjlan namar ka jingmih ki kam ba kyrkieh ba hap pyndep shane”.
Haba kylli, ula ong “Haba phai sha ka elekshon GHADC, ngim pat lah ban ong eiei mynta namar kan shong ha ka por ba ngi ioh. Lada ngi ioh bun ka por, ngi lah ban leit sha Ri-lum Garo”.
“Hynrei ia mynta, ngi la rai ban pynleit jingmut bad phaikhmat eh tang ha ka elekshon MLA 2028 hynrei ngim lah pat ban tip kiei ki kam ki ban mih ha kine ki sngi ban wan” ula bynrap.
Nalor kane, une u Hehduh ka VPP ula kam ba bun ki nongialam sain pyrthei na kylleng ki Jylla ka thain Shatei Lam Mihngi, kila pynpaw ia ka jingkwah ban wan iasoh sha ka party.
“Ki don bun ki nongialam na ki Jylla bapher bapher ka thain Shatei Lam Mihngi kiba la pynpaw ia ka jingkwah ban iasoh sha ka VPP namar ki nongrim bad ki mat treikam kum ka seng sain pyrthei” ula ong.
“Ki nongialam na Tripura, ZPM, Mizoram kila dep iakynduh ia ngi. U General Secretary jong ngi ruh ula iakynduh ia ki nongialam na Assam, kiba dei ki trai riewlum namar ka don ka jingsngewkhia bad ka jingdonkam ban ieng tylli kawei ban iada ia ki riewlum trai jylla jong ka thain” ula ong.
Haba kylli, u President ka VPP ula ong “Ngi la pynpaw ia kane ha ka por ba ngi leit iashimbynta ha ka jingbam smai jong u MP jong ngi, sha kiwei pat ki nongialam na kiwei ki Jylla ba ngi dei ban don ka jingiasngewthuh jingmut kum ki nongialam n aka thain khamtam haba ka bha ka miat jong ngi ka iatakhuh ba ki ain ka Sorkar Pdeng”.
“Kumta, ka VPP kan pyrshang ban iakren ia ki nongialam sain pyrthei jong ki Jylla bapher bapher ka thain Shatei Lam Mihngi” ula bynrap.
 Bah Ardent M Basaiawmoit ha ka sngi Ba-ar ula iathuh ba ka party kala sdang ban iuhkjat ha Ri-lum Garo.){kind=link}