Shillong, Jymmang 08 : Ka kynhun kaba 20 ngut ba la ialam da u Bah Dipshon Rynthathiang, Chairman, MSOA Podium Finish Committee ryngkat ka jingiadonlang u Working President ka MSOA Bah John F Kharshiing kila bteng biang ia ka Phase-2 Sports Talent Identification ha ka 8 tarik Jymmang ha Demdema C&RD Block, West Garo Hills District, ha ka madan Basketball jongka skul St Francis School, Mronggre Village.
U Bah JF Kharshiing ula pyntip ba kane ka jingbteng kala long biang mynta kadeinamar ba ha ki ar taiew kiba la dep kala don ka jingkhang ia ki skul hapoh rilum Garo na ka daw jong ka jingkhluit palat ka mariang bad mynta ka sngi ka jingkhluit kala kham duna bha.
Ula iathuh ba ia ka STAR Talent Identification program kaba la pynlong da ka MSOA hapoh ka jingiatreilang bad ka Dept of Sports & Youth Affairs, jong ka sorkar jylla hapoh ka jingkhmih jong ka Edge10-Sportality kaba iarap ha kaban pyniaid ia kane ka program ha ki C&RD Block.
“Ki phra tylli ki skul kiba la iashimbynta ha ka STAR Talent Identification Program hynne ka sngi, ki kynthup ia ka St. Francis School, Shyam Nagar Govt LP School, Kalapani Secondary School, Shyam Nagar Govt UP School, JN Higher Secondary School, Gime New Model Govt School, Gimegari Deficit Secondary School, Chambakpara Govt. LP School kiba hap hapoh ka Demdema C&RD Block, West Garo Hills District, Meghalaya” la pyntip u Bah Kharshiing.
Ula iathuh ba kila ioh ban Test kumba 225 ngut ki samla kynthei bad shynrang naduh ka rta kaba 10 snem haduh 18 snem, ha kaba la phah iaki ban ialehkai ia ki saw tylli ki jingialehkai ha kaba la thew thik pa thik da ki kor ki bor ka juk stad mynta (digital equipments) kiba la wanrah na ri Australia bad England.
U President ka MSOA ula pynkynmaw ba ha ka Phase-1 la Test kumba 4541 ngut ki samla nongialehkai bad ha kaba la shah jied kumba 200 ngut kiba tbit kiba la poi shakhmat eh ban poi sha ka Elite Pathway Program kaba shi snem.
“Namar ki jingkyrmen kiba mih na kane ka rukom wad ia ki khynnah kiba don sap, ka tnad Sports and Youth Affairs kala bteng ia ka STAR program ban Test sa kumba shiphew hajar ngut ki samla ialehkai hapoh ki C&RD Block bad haduh mynta ka sngi, na ka phase-2 la dep test kumba 7500 ngut na ka shiphew hajar ha baroh kawei ka jylla Meghalaya” ong u Bah Kharshiing.
Ula pyntip ba ynda la pyndep ia kane ka phase-2 STAR talent Identification program da u nongialehkai haka Olympic u Ian Campbell bad ka kynhun jongu, kumta kin sa ai ka kaiphod kaba bniah halor ka jingshem ka jongki, sha ka Meghalaya State Olympic Association bad ia ka Department of Sports and Youth Affairs bad la khmih lynti ba nangne ruh kin dang mih shuh shuh ki samla kynthei bad shynrang kiban don ka jinglah ki bor ialehkai katkum ki jingthew (benchmarks) ha ka kyrdan International.
U Bah Kharshiing ula pynpaw ba haduh kine ki sngi, ka MSOA lyngba kane ka program kaba kyrpang kala lap ia ki samla ka jylla kiba don ki sap kiba kyrpang bad kaba donkam ka long ban nang shuh shuh iaki lad jinghikai kiba kyrpang ia kitei ki samla kiba don ka sap kaba ia ryngkat bad ki nongialehkai ka pyrthei.
“Kumba ka long kane ka program kala plie lynti ia ki coach, Asst Coach, Grassroot Coach ban ioh ban tip ia ki rukom ai jinghikai kiba donkam lyngba kine ki Olympian kiba la paw kiba la im sngi ha ka kam ban kyntiew ia ki nongialehkai bad ia ki nonghikai” la pynkut u President ka MSOA.
