Shillong, Risaw 31: Ka Byatikram ha ryngkat ka jingiatreilang bad ka ‘The Times of India’ bad ka Rabindranath Tagore Club, Laban kin pynlong iaka program Concert kaba ar – ka “Remembering the Maestro -SD Burman” ban kynmaw burom ia u nongthaw jingrwai Sachin Dev Burman.
Ia ka Concert yn pynlong ha ka 9 tarik Naiwieng ha U Soso Tham Auditorium, Shillong, Meghalaya.
Ha kane ka Concert yn don ka jingrwai chorus da ki 69 ngut ki nongrwai, ban rakhe ïa ka jingnoh synñiang jong u Burman ha kam rwai.
U Lat ka jylla Meghalaya u Chandrashekhar H Vijayashankar un long kum u kongsan ha ryngkat u Bah Lou Majaw, Manisha Hazarika, bad Naba Bhattacharjee.
Ia ka burom ‘SD Burman Memorial Byatikram Life Achievement Award 2025’ yn ai sha u nongtem ba pawnam ka Jylla Meghalaya u Bah Rudy Wallang.
Ha kane ka sngi yn don ka jingtem iaki jingrwai u SD Burman daki nongtem ba kynthup Jayati Bhattacharjee, ka Chandrima Bhattacharjee, bad Urmimala Choudhury.
U Patron-in-Chief ka Byatikram Group u Dr. Saumen Bharatiya, u la ong “Kane ka Concert ka dei ka jingai burom ia u SD Burman ba pawnam, uba la synniang daki jingrwai iaka Ri ha kaba ki jingrwai ki dang iai bteng ban ai mynsiem ia ki nongrwai”.
Naka liang u President ka Rabindranath Tagore Club, Laban u Pankaj Deb u la ong “Ka jingiadei jong u SD Burman bad ka thain shatei lammihngi ka long kaba jylliew bha, bad ka Shillong ka pynpaw shisha ia ka mynsiem bad ki tynrai jong ka kam thaw jingrwai jong u”.
Kane ka Concert kadei kaba plie lad ia baroh ki paidbah bad kadei ruh kum shi bynta ban kynmaw kyrpang ia u Zubeen Garg.
