Shillong Nailar 05: Da ki hajar ngut ki paidbah hynne ka sngi Saitjaiñ kila iasnohkti haka Paeace Rally kaba la pynlong da ka Catholic Association of Shillong (CAS) ban kyntu iaka President ka ri India ka Droupadi Murmu ba kan tuklar na ka bynta ban pynkut noh iaka jingiakynad hapoh ka jylla Manipur.
Ki nongialam na ki seng sain pyrthei bapher ruh kila wan iashimbynta ha kane ka rally kaba la sdang na Madan Iewrynghep (Firebrigade) bad pynkut pat ha Don Bosco Square, Laitumkhrah. Kine ki kynthup ia ki nongialam na ka seng NPP kaba long ruh ka Myntri Sorkar ka Kong Ampareen Lyngdoh, u MLA ka seng Congress uba long ruh u Nongialam ka Liang Pyrshah u Bah Ronnie V Lyngdoh, u President ka AITC bad u MLA ka Nongthymmai Bah Charles Pyngrope, u MLA ka BJP na South Shillong u Bah Sanbor Shullai, u MLA ka VPP na North Shillong u Bah Adelbert Nongrum bad kiwei kiwei.
Ki samla pule kila rah ia ki jingthoh kiba thoh, sangeh noh iaka jingiaumsnam ha Manipur, ka jingsuk mynta ka jingsuk lashai bad ym dei ban ngam jyllop ha kane ka pyrthei kaba dap da ki jingshempap bad kumta ter ter.
Ki nongialam niam ruh kila wan ban iashimbynta ha kane ka rally bad iashimbynta ha ka jingbuh jingduwai kyrpang kaba la pynlong ha ka madan jong ka St Anthony’s Higher Secondary School.
Hadien kane la pynbud pat da ka jingleit ai iaka dorkhas sha ka President jongka ri India lyngba u Lat ka jylla Meghalaya u Phagu Chauhan.
“Ngi sngewsih iaka jingduh ia ki mynsiem briew, ka jingpynkhein ia ki riti synshar jong ka ri ha kaba iadei bad ka jingshngain bad jinglong kyrpang jong ki shynrnag, kynthei bad ki khynnah bad ka jingthombor ia ki jaka mane Blei bad ki jaka pule. Ngi dap ruh da ka jingbitar ban tip ba ki bor sorkar kila pyndonkam bakla iaka bor jongki ban thombor ia ki briew kiba luilui hapoh Manipur” ong u President ka CAS u Bah JA Lyngdoh ha ka dorkhas.
“Kum ki nongshong shnong kiba don ia ka jingkitkhlieh hapoh ka ri, Ngi dawa ba kiba donkti ha ka kam iaumsnam bad kiwei kiwei kiba donbynta lang kidei banshah pynshitom. Ngi kyrpad ba phin tuklar hi dalade bad ban ai iaka jingbthah ia baroh ki bor kiba dei khmih kiba don iaka jingkitkhlieh na ka bynta ban ai jingshngain ia ki paidbah jong kane ka ri bad ia baroh ki Commission kum ka Human Rights Commission bad kiwei pat ki Commissions for the Protection of Women and Children, jong ka sorkar pdeng bad sorkar jylla ban shim da ka “Suo Motu” halor baroh ki kam be-ain bad ki jingjia ha ka jylla Manipur” ula ong.
U Bah Lyngdoh ula ong ruh ha ka dorkhas “Ba ki khmih lynti bad ngeit skhem ba ha ka bor ka jongka kan ym sngap jar halor kitei ki kam shah lehbein bad jingshah thombor kiba la jia hapoh ka ri bad ki kyrpad ruh ban shimkhia mardor bad ban phah iaka khubor jong ka jingsuk bad jingiatylli, da kaba shim ia baroh ki sienjam ban iada ia ki jingim briew bad ia ki jingdon jingem, ban pynneh pynsah biang iaka jinglong kyrpang ha ka longbriew manbriew bad ban wanrah iaka mynsiem jong ka jingiatylli kumba la pynkupbor da ki ain jong ka riti synshar ka ri bad kumta ka dei ban ai iaka jingbishar kaba hok bad dei ban pynneh iaka shongsuk shongshngain ha kano kano ka dur ruh”
U Bah Lyngdoh ula ong, ba ki nongshong shnong ka Meghalaya ki dang da ka jingkyndit bad jingbitar halor ka jingleh ia ka kam bymman kaba shyrkhei ha kaba ki khun kynthei jong ka ri kila shah pyn law jain lyngkhuid, shah shoh shah dat, shah leh kynshlein, shah pyniaid lyngkhuid bad shah leh be-ijot ha bun ngut ki briew kumba la sakhi da baroh ha ki social media.
Ula ther ruh ia ki briew kiba don ha ka bor khamtam eh ia ki pulit ba kila kylla long tang ki nongpeitkai ia ka jingiaumsnam bad ailad ia ki paidbhur ban leh khlem akor ia kawei ka longkmie, ban pyniap dusmon iaka u khun ba dang 19 snem bad ia u kpa hapoh surok, katba ki dang pyrshang ban iarap ban pyllait im ia kane ka longkmie kaba la shah leh khlem akor.
Nalor kane, ka jingthombor ia ki Khristan kadei kaba la da iasylla bha ha kaba palat 249 tylli ki iingmane hapoh jong ka thaiñ Imphal, Manipur kila shah pynjot bad pynjulor bad shah thang bad kane ka jingthombor kala ktah ia baroh ki kynhun jong ki shynrang, kyntheo bad ki khynnah bad kala don ruh ka jingduh ia ki jingdon jingem jong ki riewpaidbah bad ia ki jingdon jingem jongka sorkar.
“Ki bor sorkar kila pulom lut ha kaban iada ia kiba luilui bad ban pynneh iaka jingsuk bad jingbishar hok ha ka jylla. Ngim lah khlem da pynrem jur ia kane ka jingleh bymman ha kaban iaumsnam bad ka jingthombor ha ka jylla Manipur” ong u Bah Lyngdoh.
U Secretary jongka Khasi Jaintia Church Leaders’ Forum (KJCLF) u Rev Dr Edwin H Kharkongor ula ong, “Ngi la iashimbynta bad iatreilang ban pynpaw, ban pyni bad ban phah ia ka jingsngewlem sha baroh ki lanot jong katei jingiaumsnam bad jingpyniap ha Manipur, kiba la mad iaka jingeh jingshitom bad kiba don hapdeng ka jingshem lanot. Ka pyrthei baroh kawei kala iohi ia kane bad kadei kaei kaei kaba ym lah ban poi pyrkhat bad kadei kaei kaei kaba ym lah ban pdiang satia kum ka imlang sahlang”
“Ha kane ka rally ngi kwah ban pyni sha ki paidbah ka Manipur bad sha kiwei pat khamtam ha kito kiba don ha ka bor kiba dei ban shim ia ka jingkitkhlieh ha kano kano ka lynti kaba kidei ban shim ban pynkut noh ia kane ka jingiaumsnam bad kumjuh ruh na ka bynta kito ki briew kiba don ia ka jingmut jingpyrkhat ban sdang iaka sienjam ban lum hajuh ia ki paidbah ban wanrah ia ka jingsuk, jingkyrmen, jingiamap mar kylliang bad ban iasngewthuh jingmut noh. Ngi hap ban pyrkhat naka bynta ki khynnah bad naka bynta ka lawei jong ki pateng ban dang wan ba ka jingsuk kadei ban wanphai bad kadei ba nsdang noh mynta hi” ula ong.
Ha katei ka Peace Rally la wanrah ruh ban iashimbynta da ki briew kiba na Manipur kiba shong basah ha kylleng ki bynta jong ka Meghalaya.
 ban kyntu iaka President ka ri India ka Droupadi Murmu ba kan tuklar na ka bynta ban pynkut noh iaka jingiakynad hapoh ka jylla Manipur.){kind=link}