Sawa ka jingdawa ILP bad ban ithuh noh ia ka Ktien Khasi/Garo ha Jantar Mantar, Delhi

Delhi, Naiwieng 03: Ka Hynniewtrep Achik National Movement (HANM) hynne ka sngi Thohdieng, kala pynlong iaka jingiakhih da kaba shong kyllain mungngor ha Jantar Mantar ban dawa na ka sorkar pdeng ban pyntreikam noh iaka Inner Line Permit (ILP) ha ka jylla Meghalaya, ban pynrung noh ia ka ktien Khasi bad Garo haka khyrnit kaba Phra jong ka riti synshar ka ri bad ban pynbeit noh ia u pud u sam hapdeng ka jylla Meghalaya bad Assam.

Ha kane ka jingiakhih ki dkhot ka HANM kila rah ia ki jingthoh bad kila pyrta jam ba ka sorkar pdeng kadei ban pynurlong noh ia ka jingdawa jong ki paidbah ka jylla Meghalaya bad kam dei ban shu kut tang ka jingkhmih bniah ia kitei ki jingdawa.

Ia kane ka jingiakhih la wan ban kyrshan da ki MDC jong ka Khasi Hills Autonomous District Council (KHADC) kiba kynthup ia u Bah Bajop Pyngrope bad u Bah Sherbor Mawlong bad ki nongialam jong ka Jaintia National Council.

Haba kren ha ka jingialang u Bah Bajop Pyngrope ula ai jingiaroh iaka seng HANM kaba la wan ban pynlong ia kane ka jingiakhih ha Nongbah Delhi ban pynsawa jam ia kane ka jingdawa sha ka sorkar pdeng.

Ula ong, ba ka long kaba kongsan ban pynrung noh ia ka ktien Khasi bad ka Garo ha ka Eight Schedule namar kan ai jingmyntoi ia ka jaidbynriew Khasi bad Garo namar lada ki samla ki leit ban ialeh ia ki eksam kiba heh kum ka IAS, IRS, IPS bad kiwei kiwei kin ioh ban thoh noh ha la ka jong ka ktien tynrai kaban long ka jingmyntoi bad ka jaidbynriew kan lah ban sei ia ki heh ophisar.

“Ki IAS kiba don ha Secretariat kidei na kiwei pat ki jaidbynriew, namar ba ki jaidbynriew Khasi bad Garo haduh mynta ki hap ban leit thoh ia ka IAS eksam da ka ktien phareng ka bym dei ka ktien jong ki kmie ki kpa jong ngi. Lada ioh iaka jingithuh jong ka ktien Khasi bad Garo ha ka Eight Schedule kin sa mih bun ki IAS napoh ka jylla jong ngi ban pynbit pynbiang ia jylla baieid ka jong ngi” ong u Bah Bajop.

Ha kaba iadei bad u pud u sam, u Bah Bajop ula ong ba ka Meghalaya kala ioh ia ka jylla mynta la 50 snem hynrei kam don satia ia u pud u sam ba pura haduh mynta bad ka long kaba donkam ban pynbeit noh ia u pud u sam.

Na ka liang u Bah Sherbor Mawlong ula ong, “Ki sengbhalang ki don da ki phew phew tylli hynrei kaba sngewsih ka long ba dei tang ka HANM kaba shim ia ka jingkitkhlieh. Ngin iakhih haban da ka jop, ngin ym tieng ne smiej ia ki lathi jong ki shipai ne pulit lada phi ki paidbah phi shah kem, ai ba u Bah Sher yn shah kem nyngkong na ka bynta ka bit ka biang jong ki longdien mandien”.

Ula ong, ba da ka mynsiem kaba shitrhem ula wan ban iashimbyntalang ha kane ka jingiakhih ha Nongbah Delhi bad ym kwah ba kane ka jingiakhih kan shu kut tang ha Shillong.

Katba u President ka JNC u Bah Sambormi ula ong ba ka jaidbynriew kam don ka jingpyrshah ia ki briew kiba nabar ka jylla ban wankai sha ka jylla hynrei ka long pat kaba donkam ban don iaka ILP ban iada ia ka jaidbynriew na ka jingwan rung kyrthep ki briew kiba nabar ka jylla.

Ula ong, ba ka MHA kala kynthup ia ki 38 tylli ki ktien kaba kynthup lang iaka ktien Khasi ha ka Eight Schedule bad u ngeit skhem ba dei ba lyngba kane ka jingiakhih kaba la pynlong ha Delhi ka sorkar pdeng kan jubab noh bad kan pynurlong noh ia ka jingdawa jong ka jaidbynriew.

Katba u General Secretary ka HANM u Bah Kyllang Thongni ula ong, ba lada ka sorkar pdeng ka leh bym patiaw ia ka jingdawa jong ka jaidbynriew, ka seng kan wan ialam ia ki paidbah ban pynlong da ka jingiakhih kaba heh hakhmat jong ka India Gate.

Ula ong, ba ka sorkar Meghalaya kadei ban pynlong noh ia ka ktien Khasi bad Garo kum ki Official Language jong ka jylla namar kuma long mynta haka jylla Meghalaya la pynlong iaka ktien English kum ka Official Language ka by mdei satia ka ktien tynrai jong ka jylla.

U Bah Kyllang ula ong ban lah ban pynurlong ia kane ka jingthmu ha kaba iadei bad ka ktien Khasi bad Garo ka long kaba kongsan ba ki jaidbynriew Khasi bad Garo ki iatreilang bad ba kin nym don ia ka mynsiem ia bsihni khamtam haba ka ktien Khasi kala rung lypa haka thup jong ki 38 tylli ki ktien kiban sa ioh iaka jingithuh ban pynrung ha ka Eight Schedule.