Sawa biang ka sur dawa ILP ha Jylla | Pynrem ka Meghalaya ia ki nongpynbudnam sniew ba shah pyniap u nong Indore

Shillong, Jylliew 10: Hadien ka jingmih ki jingshisha baroh halor ka jingshah pyniap dang shen jong uwei u nongjngohkai pyrthei na Indore ha Sohra, ka jingdawa ban pyntreikam ia ka Inner Line Permit (ILP) kaba dei ka ain ban ïada na ka jingwan rung ki briew, kala sawa biang ha Meghalaya.

Ïa kane ka jingdawa la pynpaw biang ha ka jingïakhih ba jai jai kaba la long ha Khyndailad Shillong.

Kane ka jingiakhih ba jai jai kadei ban pynrem jur ïa ka jingthmu ban pynbud nam sniew ïa ka Meghalaya bad ki briew kiba ieid iaka shong suk shong shngain daka jingpyllair iaki khubor ki bym dei bad kiba bakla halor ka jingshah pyniap u Raja Raghuvanshi haki thain Sohra.

Ha kane ka jingiakhih kaba jai jai la khot da ka longkmie kaba don jingsngewkhia ka Kong Mary Victoria Marwein kaba shong basah ha Lawsohtun, Block-4 Shillong bad ha kane ka sngi la iohi ia ka jingiashim bynta jong ki briew na ki bynta bapher bapher kynthup ia ki nongialam na ki seng bhalang bapher bapher.

“Ngi don hangne ban pyrshah ia ka jingpyrshang ban pynjah burom ia ka jylla bad ki paidbah jong ngi. Kum ki longkmie, ngi sngewkhia ba ki jingiathuhkhana kiba sniew kin ktah ia ki khun bad kiba ieid jong ngi, kiba trei bad pule shabar Meghalaya” la ong ka Kong Mary.

“Nga kyntu ia ka Sorkar Jylla bad ka tnat pulit ba kin leh da kaba tyngeh ia ka iing ka sem jong kitei ki arngut bad ia kiba donkti ban pynbud nam sniew ia ka dur ka dar jong ka jylla. Ngi dawa ba ki dei ban pan map paidbah na ki paidbah ka jylla Meghalaya” kala ong.

U Kunal Murdani, uba dei u nongshong shnong na Assam haba pynpaw ka jingsngewkhia halor ka jingshah pynthohbria ka Meghalaya u la ong, “Ïa kane ka jingjia ha Sohra la pynbud nam sniew khlem da tohkit ban lap iaka jingshisha ha kaba ki National Media kila kynthoh iaka Meghalaya kum ka ‘Crime prone hill’. Ki lad pathai khubor kidei ban kiar na kum kine ki jingkynthoh khlem da tohkit bniah iaka jingshisha”.

U Kunal u la ong ruh ba kam don kano kano ka jinghiar ha ka jingwan ki nongjngohkai pyrthei watla la kala don ka jingpyrshang ban pynjah burom ïa ka jylla.

“Ki nongjngohkai pyrthei ki la wan jngoh shane bad ki briew ki la ïathuh khana ïa ki jingïakynduh jong ki ha ki por ba la leit noh bad ngam tharai ba kan hiar ka kam jngohkai pyrthei. Wat haba nga don hangne nga ïohi ïa kiba bun ki nongjngohkai pyrthei kiba ïaid shadien bad ki pla jong ki kumta ngam tharai ba ka don kano kano ka jinghiar ha ka jingwan ki nongjngohkai pyrthei hynrei ngi donkam ban khring shuh shuh iaki nongjngohkai pyrthei ban wan sha Shillong namar ka Shillong kadei ka jaka ba itynnad bad kaba shngain” u la ong.

Naka liang u President ka HYC u Bah Roykupar Synrem u la dawa na ka Sorkar Jylla ba ka dei ban pyntreikam noh mardor ia ka ILP na ka bynta ban pynbeit ia ka jingwan rung ki briew sha kane ka jylla.

U Bah Roy u la ong ba ka ILP kan dei ka sienjam lane ka jingkhang kaba khlain ban pyrkhing ia ki briew kiba wan sha kane ka Jylla da ka jingthmu ban leh ia kano kano ka kam runar.

“Hadien bala lap iaka jingshisha halor ka jingshah pyniap u Raja Raghuvanshi ha Sohra bad hadien ka jingwad bniah hynnin ka sngi, ngi la tip ba ki briew kiba nabar ka jylla ki dei kiba donkti ban leh ia ka kam pyniap briew. Kine ki briew kila wan ha ka dur kum ki nongjngohkai sha kane ka Jylla bad hadien ba ki la leh ia katei ka kam runar ha katei ka juh ka sngi, ki la leit phai sha Assam bad nangta sha Uttar Pradesh. Ym tang kane ka jingjia, ngi la ïohi ïa ka jingshah lute ATM ha Mawkriah bad kiwei kiwei ki jingjia ha kaba ki briew nabar ka jylla ki leh ïa ki kam sniew bad ki phet sha kiwei pat ki jylla ka Ri” la ong u Bah Roy.

“Lada ka ILP ka la don, kan jin da la don ka rukom treikam ha kaba ïa ki jingtip ba bniah jong uwei pa uwei u nongwan jngohkai bad uwei pa uwei uba rung sha ka jylla, yn buh jingthoh ïa ki kyrteng jong ki. Hangno ki sah bad katno sngi bad la kine ki briew ki la leit ne ki dang pynjlan ïa ka jingsah jong ki ha kane ka Jylla, baroh kum kine ki jingtip kin don” u la ong da kaba bynrap “Lada u briew u rung ha kane ka Jylla bad lada u donkam ban ai iaki jingtip halor jong u, kane kan pynsangeh iaka jingmut jingpyrkhat jong u ban leh kam runar namar ïa ka kyrteng jong u la don bad ki pulit haka por ba u rung shapoh Meghalaya kumta kan pynmih ïa kata ka jingktah kaba pynsangeh bad shwa ban leh ïa ka kam runar uta u briew un pyrkhat shispah sien.”

“Dei na kata ka daw ba ngi dawa ba dei ban pyntreikam ïa ka ILP ha Meghalaya, ka rukom treikam ha kaba ka kyndon halor ka leit ka wan jong ki briew ka dei ban don namar kumba long mynta uno uno u briew u lah ban wan rung shapoh ka jylla Meghalaya ban leh ïa ka kam runar bad nangta u phet sha kiwei pat ki jylla kumta ka buh jingeh ïa ki pulit ban buddien ïa ka leit ka wan jong kine ki briew” u la ong.

Lah ban kdew ba haka 9 tarik mynta u bnai, u nongialam ka Liangpyrshah u Dr Mukul Sangma u la pynpaw ia ka jingdonkam ban don ki ain kiba khlain ban khanglad ia ki briew ban pynlong ia ka Meghalaya kum ka jaka ban leh ia ki kam runar bad u la kyntu ruh ia ka Sorkar ba kan pyntreikam noh mardor ia ka Meghalaya Residents, Safety and Security Act (MRSSA), 2016.