Shillong, Jylliew 10 : U Nongaiktien ka Sorkar bad Myntri Bah Paul Lyngdoh ha ka sngi Ba-ar, ula ong ba ka Meghalaya ka donkam ban pynkhlain ia k lad jingiada naba ka jingap ia ka jingmynjur ka Sorkar Pdeng ban pyntreikam ia ka Inner Line Permit (ILP) ka lah ban nang shimpor.
Haba iakren bad ki nongthoh khubor, u Bah Paul ula ong ba ka ILP ka dei ka mat jingdawa kaba dang iai bteng haduhmynta bad ka dei ruh kawei ka mat kaba kongsan kaba la dep pynskhem da ka Iingdorbar Thaw Ain ka Jylla.
“Ka dang dei ka jingdawa ba iahap hynrei ha kane ka khep nga lah ban ong ba ngi dei ruh ban pynkhlain ia ki lad jingiada namar ban ap ia ka jingmynjur jong ka Sorkar Pdeng halor ka ILP ka lah ban nang shimpor. Ha ka jingshisha kala shimpor shibun” ula ong.
Haba pynpaw ba ka Sorkar kan sa nang pynkhlain bad pynthymmai ia ka Standard Operating Procedure (SOP) na ka bynta ka jingiada bad ka jingshngain ki nongshongshnong bad ki nongwankai sha Jylla, u Bah Paul uba bat ruh ia ka kam jngohkai, ula ong “Ngi don ruh ia ka Meghalaya Residents, Safety and Security Act (MRSSA), kaba donkam ban hap pynkhlain”.
Ka jingdawa ia ka ILP kala nang jur hapoh ka Jylla khamtam hadien ka jingseisoh ka jingtohkit ba lah ban sei ia ki jingshisha halor ka jingshah pyniap u nong Indore ba wan honeymoon sha Sohra.
Kat kum ka jingong ki Sengbhalang ba ialam hakhmat eh ia ka jingdawa, ka ILP kan long kum ka jingkhanglad kaba khlain ia I briew kiba wan sha Jylla da ki jingthmu ban leh kam sniew.
 ka lah ban nang shimpor.){kind=link}