Shillong, Kyllalyngkot 02: Ka Meghalaya ka hap ban ialehkai bha, namar ha ka Group B jong ka Final Round jongka 79th Senior Men’s National Football Championship Santosh Trophy 2025-26, ka Meghalaya kala ngat lang bad ki kynhun kiba la rah teng ia ka nam lahduh.
Ha kane ka jingpynkhlai nusib ha ka 31 tarik u Nohprah ha ka ophis treikam jong ka All India Football Federation ha New Delhi, ia ka Final Round yn pynlong da ka Jylla Assam naduh ka 21 tarik u Kyllalyngkot ha kaba la phiah ia ki 12 tylli ki kynhun ha ki ar tylli ki Group kaba kynthup mar 6 tylli ki kynhun.
Ha ka Group A ka kynthup ia ka Assam, West Bengal kaba dang bat ia ka nam lahduh, Tamil Nadu, Uttarakhand, Nagaland bad Rajasthan.
Ha ka Group B ka kynthup ia ka Meghalaya, Kerala, Services, Punjab, Odisha bad Railways.
Ka Kerala ha u snem uba la dep kadei ka kynhun kaba la wan baar bad kadei ka kynhun kaba la jop la bunsien ia ki jingiakob ialehkai ha ka ri bad kaba khatduh ba kan rah ia ka nam lahduh kadei ha u snem 2021-22. Ka Services kala long ka lahduh ha u snem 2023-24 bad kane ka kynhun kala pynrem ia ka Meghalaya ha ka Quarterfinal kaba la long ha u snem 2024-25.
Ka Punjab kadei kaba la rah teng ia ka nam lahduh ha u snem 2007-08 hynrei hadien kane kala shu wan ha ka kyrdan ka baar, katba ka Railways kala rah ia ka nam lahduh 60 snem mynshwa, hynrei ha u snem 2013-14 kala wan Baar.
Ka Meghalaya bad ka Odisha kim pat ju ioh rah ia ka nam lahduh, ka Meghalaya kala shah pynrem ha ka Final ha ka Karnataka da 3-2 ha u snem 2022-23 bad katei ka kynhun kadei kaba la ialam hi da u juh u Coach uba mynta, u Bah Khlain Pyrkhat Syiemlieh.
Ka Meghalaya ha u bnai ba la dep kala iakhun tyngeh ha ka Group Stage ban ioh rung sha ka Final Round hadien ba kala long ka lahduh ha ka Group kaba kynthup ia ka Sikkim bad Arunachal Pradesh. Wat hapdeng jong ka por jong ka jingioh shuti, hynrei kane ka kynhun kala pyntbit bad pynkhreh bha na ka bynta ka rynsan kaba heh kaba kin leit ban ialehkai mynta.
Ka Assam kum ka Jylla kaban pynlong ia kane ka jingiakob kala ioh rung lypa sha ka Final Round, katba ka West Bengal bad Kerala ruh kila ioh rung lypa kum ka kynhun kaba la rah ia ka nam lahduh bad kaba wan baar ha u snem 2024-25.
Kin don 4 tylli ki kynhun na kawei ka Group kiban ioh rung sha ka Knockout bad ia ka Quarterfinal yn pynialehkai ha ka 2-3 u Rymphang bad ia ka Semifinal ha ka 5 tarik u Rymphang bad ia ka Final yn pynlong ha ka 8 tarik u Rymphang.
