Shillong, Naiwieng 17: Ka Meghalaya Football Association kala pynbna ia ka kyrteng jong ki 22 ngut ki nongialehkai Football ka jylla hapoh ka jingialam u Coach ba pawnam ka Jylla Bah Hering Shangpliang, ki ban leit iashimbynta ha ka Senior Men’s National Football Championship ka Santosh Trophy 2024-25.
Kane ka kynhunialehkai jong ka jyllla kan mih na ka nongbah Shillong lashai ka sngi Nyngkong ban leit sha Nalbari, Assam, ha kaba ki kynhun kiba hap ha ka Group E kin ialehkai.
Ha ka jingialang ban kitbok ia kine ki nongialehkai kaba la pynlong ha ka sngi Saitjaiñ, ia kane ka kynhun yn ialam da u Fullmoon Mukhim kum u kapten bad la ioh ia ka kyntien ai mynsiem na u President ka MFA u Bah Hamletson Dohling, u General Secretary bah Sunesh Syiem bad u Vice-President Bah Cliff Nongrum.
“Haba peit ia ka kynhun. Nga tip ngi don ia ka kabu kaba khlain bha. Kane kadei ka kabu ksiar ia phi ba phin wanrah burom ia ka jylla bad ngi kum ka MFA ngi don ka jingkyrmen ha phi” ong u Bah Hamletson Dohling.
Ka Meghalaya kan iakhun nyngkong pyrshah ia ka Arunachal Pradesh ha ka 20 tarik u Naiwieng bad ha ka 22 tarik u Naiwieng kan iakhun pyrshah ia ka Nagaland, katba haka 24 tarik u Naiwieng pat kan iakhun pyrshah ia ka Assam.
Tang ka kynhun kaba long ka lahduh ha katei ka Group kan ioh ban rung sha kawei pat ka Round ne bynta.
Ki nongialehkai ka jylla ki long kiba tbit bad kiba la don ia ka jingshemphang ha ka rukom ialehkai bad kiba bun napdeng ki jongki kidei kiba la shim na ka jingiakhun ia ka Shillong Premier League 2024.
Ka kynhun jong ka Meghalaya:
Goalkeepers – Siwel Rymbai, Rajat Paul Lyngdoh, Lambhamiki Lamare
Defenders – Wanboklang Lyngkhoi, Aibiam Mame Nongneng, Donborlang Nongkynrih, Overkindness L Mawnai, Badondor Marbaniang, Banraplang Pyngrope bad u Arlanky Nongsiej
Midfielders – Baiaikara Swer, Aenam G Jyrwa, Fullmoon Mukhim (C), Damanbhalang Chyne (VC), Farming Suting, Dibormi Kassar, Kevin Rymbai bad u Robertson Khongriah
Forwards – Donlad Diengdoh, Deibormame Tongper, Khrawkupar Jana bad u Owanijuh Pajuh
Ki nongkhmih bad nongpyniaid ia ka kynhun ka Meghalaya: Bah Hering Shangpliang (Head Coach), Dapmon Tariang (Assistant Coach), Amit Rai (Goalkeeping Coach), Freddy Kharpran (Manager) bad u Elderson Warbah (Physio).
