Shillong, Dec 28: Ka kynhun ialehkai Football jong ka Meghalaya hynne ka sngi Thphdieng kala mad noh ia ka jingrem ha ka jingiakhun ia ka Senior Men’s National Football Championship jongka Santosh Trophy 2024-25 da kol 2-1 ha ka kynhun ka Services, ha ka Quarterfinal kaba la long ha Hyderabad.
Ka Services kaba dang bat ia ka nam lahduh kala ioh thep 2 kol ha ka kylla step lyngba u Thingnam Bidhyasagar Singh ha ka minit kaba 33 bad u Rahul Ramakrishnan ha ka minit kaba 46 hadien ba kala don ka jingleh bakla na ki rang kiba ialehkai shadien jong ka Meghalaya.
Watla ka Meghalaya kala shah thep 2 kol kam shym la duh jingkyrmen hynrei kala ialehkai bha bad kala ioh thep shi kol ha ka minit kaba 86 lyngba u Overkindness L Mawnai.
Ka Services mynta kala jop 4 sien na ki 5 tylii ki jingiakhun ha ka Santosh Trophy pyrshah ia ka Meghalaya.
Ha ka kylla miet u coach ka Meghalaya u Bah Hering Shangpliang ula pynmih bujli ia 5 ngut ki nongialehkai bad ka Meghalaya kala ioh ia kiba bun ki kabu hynrei ka jingpyrshang kam shym la seisoh bad kiba bun kila poi sharud hynrei tang kawei hi kaba la thep da u Overkindness kaba la rung shapoh kol.
Ka Meghalaya kala shah pynjem khnap noh, watla kala jop saw sien, iakhaid lai sien bad mad arsien ia ka jingrem ha kane ka lympung.
Hynne ka sngi ha kawei pat ka jingiakhun ka Kerala kala pynrem ia ka Jammu & Kashmir da 1-0.
Katba hynin ka sngi, ka West Bengal kala pynrem kala pynrem ia ka Odisha da 3-1 hynrei ka Manipur kala pynrem da 5-2 ia ka Delhi.
Baroh 4 tylli ki kynhun kiban iakhun ia ka Semifinal kidei kiba la bat teng ia ka nam lahduh jong ka Santosh Trophy.
