Shillong, Kyllalyngkot 27: Ka Meghalaya kala iakhun tyngeh ban iakhaid bad ka Services da 2-2 ha ka jingiakhun ha ka Group B ha ka National Football Championship Santosh Trophy 2025-26 kaba la long hynne ka sngi Baar ha Silapathar, Assam.
Ka kynhun ialehkai ka Meghalaya kala shem jingeh hashwa ban kut ka por sa tang 15 minit, ha kaba uwei u nongialehkai ula hap ban mih noh madan bad duh ialehkai da ka jingioh Red Card bad ka Meghalaya kala ialehaki sa tang 10 ngut ki rangialehkai.
Ka Services kala thep 2 kol lyngba u Jijo Jerone ha ka minit kaba 20 bad u Abhishek Pawar ha ka minit kaba 34 jong ka kylla step katba ka Meghalaya kala ioh thep ia ka shi kol hashwa ban kut noh ka jingialehkai ha ka kylla step lyngba u Deibormame Tongper ha ka 45’+1 bad ha ka kylla miet u Deibormame ula ioh ban thep ia ka kol ka baar ha ka minit kaba 64 kaba la pyniakhaid syndon ia kane ka jingiakhun.
Ka Meghalaya kala iakhaid bad ka Punjab ha ka 24 tarik u Kyllalyngkot bad kala pynrem pat ia ka Odisha.
Ha ka jingiakhun kaba hynne ka sngi, ka Meghalaya kala pynmih ia u Mebanaibok Kharbudnah bad u Robertson Khongriah ha ka jaka jong u Wanboklang Lyngkhoi bad u Babysunday Marngar.
Ka Services kala ioh thep ia ka kol kaba nyngkong lyngba ka jingshut ia ka Free Kick ha kaba u Jijo ula ioh ban pyndei da ka khlieh ia ka bol bad kala leit rung shapoh kol. Ka Meghalaya kala ioh ia ka kabu kaba biang bha ban pyniakhaid haba u nongialehkai ka Services ula kum pyndei da ka kti ia ka bol, kumta ka Meghalaya kala ioh ia ka Penalty ha ka minit kaba 30, hynrei haba u Mebankhraw Wahlang ula mih ban shut ia ka bol u nongap kol ka Services u Gagandeep Singh ula ioh ban kem ia katei ka bol ba kan ym rung shapoh kol.
Ka Meghalaya kala iai bteng ban ialehkai bha, hynrei ka Services kala ioh ban thep ia ka kol ka baar lyngba u Abhishek da uba la pyndei da ka khlieh ia ka bol bad kala leit rung shapoh kol.
Hynrei hashwa ban wai ka jingiakhun ha ka kylla step ka Meghalaya kala ioh ban thep ia ka shi kol ha kab u Owanijuh Pajuh ula pashat ia ka bol bad u Deibormame ula thep ia ka kol da kaba pyndei da ka khlieh bad ula long u nongialehkai uba lai ha kane ka jingiakhun ban ioh thep kol da ka khlieh (header).
U Deibor ula thep biang ia ka kol da kaba pyndei da ka khlieh ia ka bol kaba la shut da u Robertson lyngba ka corner kick ha ka kylla miet bad kane ka rukom thep kol kala iasyriem kumba thep ka Services ia ka kol ka baar ha ka kylla step.
Watla ka Meghalaya kala pyrshang ban ialehkai bha hynrei ha ka minit kaba 77 jong ka kylla miet kala hap ban ialehkai noh sa tang 10 ngut ki nongialehkai haba u Dawanchwa Challam ula ioh ar tylli ki Yellow Card bad la phah mih noh ia u na ka madan ialehkai.
Ka Meghalaya kala ioh ban pyniakhiad ia kane ka jingiakhun pyrshah ia ka Services bad mynta kala ioh khur 5 Point hynrei kala wan ha ka kyrdan kaba lai, hadien ba ka Railways kala pynrem ia ka Punjab da 2-0 hynne ka sngi Baar.
Ka Railways bad ka Meghalaya kila ioh khur mar 5 Point hynrei ka Railways kala tam ha kaba iadei bad ka jingioh thep kol ia ka Meghalaya. Ki 4 tylli ki kynhun kiba wan shakhmat ha ka Group kin ioh rung sha ka Quarterfinal.
Ka Meghalaya kan iakhun pyrshah ia ka Kerala ha ka sngi Palei ha ka por 2 baje mynsngi ha Silapathar.
Hynne ka sngi ka Kerala kala pynrem ia ka Odisha da 1-0 bad kala bat syndon ia ka kyrdan kaba nyngkong ha ka Group B da kaba ioh khur 7 Point na ki 3 tylli ki jingiakhun.
