Shillong, Nailur 26 : U Myntri Khynnah ka Minority Affairs John Birla ha ka sngi Ba-ar, ula iasnohkti lang ha ka Rozgar Mela ha Shillong bad sam ia ki shithi thungkam sha ki samla ba dang iohkam thymmai hadien ka jingkren u Myntri Rangbah Duh ka Ri.
U Myntri Rangbah Duh Narendra Modi ula kren ha ka Rozgar Mela bad sam haduh 51,000 tylli ki shithi thungkam sha ki samla ba dang iohkam thymmai lyngba ka video conferencing hynne ka sngi Ba-ar.
Ha Shillong, ia ka shithi thungkam la aiti sha palat 293 ngut ki samla kiba dei jong ka Tnad Department of Post, Food Corporation of India, Ministry of Health & Family Welfare, North Eastern Electric Power Corporation Limited, Ministry of Education bad Ministry of Defence.
Napdeng kine, 126 ngut ki samla kila ioh pdiang ia ka shithi thungkam hynne ka sngi ha Meghalaya.
U Myntri Khynnah haba pynpaw ia ka jingkmen halor ka jinglah pynlong ia ka Razgar Mela kaba jop, ula ong “ Ka pynkmen shibun ia nga ban donlang hangne bad don bynta lang ha ka Rozgar Mela u Myntri Rangbah Duh kaba la pynlong ha ki 46 tylli ki Centre ha kylleng ki Jylla ka Ri”.
Haba pynkynmaw ia ka thong jong u Myntri Rangbah Duh ban aikam aijam sha ki samla da ka pali pali, u Birla ula ong “Ha u Jylliew 2022, u Myntri Rangbah Duh ula shong bishar ia ka jingdon ki nongtrei ha baroh ki Tnad bad Ministry bad ula ai jingbthah ban thungkam haduh 10 lak ngut ki briew da ka Sorkar lyngba ka mission mode ha kine ki shisnem shiteng ban wan”.
Haba iakren bad ki nongthoh khubor, u Birla ula ong ba ka Sorkar hapoh ka jingialam u Myntri Rangbah Du kala skhem jingmut halor ka nongrim jong ka ‘Sabka Saath, Sabka Vikas, Sabka Vishwas, Sabka Prayass” ban tei ia ka Aatmanirbhar Bharat.
U ong ba ka Sorkar kala trei shitom ban pynthikna ba baroh ki Nongshongshnong ka Ri ki dei ban ioh lut ia baroh ki jingdonkam ba kongsan ha ka jingim lyngba ki prokram bad ki skhim bapher bapher khamtam lei ia ki longiing kiba duk ba suk ha ka imlang sahlang.
U Myntri ula mynjur ruh ba bun ki briew kila duh ia shibun ki skhim ka Sorkar Pdeng namar ka jingduna ka jingtip shaphang kine ki skhim. Namar kata, ula kyrpad ia baroh ha kaban pyntip lem sha ki paidbah ia ki skhim ka Sorkar khnang ban lah pyntreikam bha ia ki skhim bad ki policy ka Sorkar.
Kawei na ki samla ba dang shu iohkam ka samla Audrey Liza Malngiang na Shillong, haba pynpaw ia ka jingsngewnguh kala ong “Ka dei ka jingkyrkhu bad sngew burom ba nga ioh ia ka lad ban long shibynta jong ka Rozgar Mela bad nga kwah ban ai khublei ia u Myntri Rangbah Duh uba la ailad ia nga ban trei na ka bynta ka Sorkar India”.
Ka samla Audrey kala ioh ia ka shithi thungkam hynne ka sngi hapoh ka Tnad Department of Post kum ka Gramin Dak Sevak- Assistant Branch Postmaster.
Pule lang ia kane: Ther u slap ha thain Patharkhmah, julor ka kali ba khyllem u dieng
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
