Shillong, Feb 14: U Myntri ka pule puthi uba long ruh u MLA ka Amlarem Constituency u Bah Lahkmen Rymbui ha ka sngi Saitjain ula leit jngoh ia ka shnong Kyrweng bad ula aiti ia ka kali ban kit ia ki khynnah pule na ka shnong Kyrweng sha Muktapur.
Kane ka jingthmu ka long ban pynthikna ba ki khynnah kin ioh ia ka jingshngain bad ba kin lah ban ioh thikna ia ka jingpule khamtam eh ha ka por lyiur haba kan don ka jingshah ktah ha ka leit ka wan.
Haba kren ha ka jingialang u Bah Rymbui ula kyntu ia ki nongshong shnong ba kim dei ban pyndonkam bakla ia katei ka kali bad ka banjur ba kidei ban pyndonkam katkum ka jingthmu ka jongka bad ula kyntu ia ka Dorbar Shnong ba kan shim pura ia ka jingkitkhlieh ban khmih bad sumar ia kane ka kali khnang ba kan lah ban ai jingmyntoi ia ki khynnah pule.
Ha kane ka sngi, u Myntri ula sam ruh ia ki Work Order kaba kot T.5 lak ban tei shuh shuh ia ki kamra skul ha Kyrweng LP School. Kane ka projek kadei kaba la khmih lynti ba kan kyntiew ia ka jingai ia ka jingnang jingstad bad ban lah ban pyndap ia ka jingjur jong ka jingdawa na ka jingmih bun ki khynnah skul.
Nalor kane la bhah ruh sa T.1 lak ban tei ia ka painkhana jong ka skul ban ialeh ban pynneh ia ka jingkhuid jingsuba bad na ka bynta ka koit ka khiah jong ki paitbah.
Nalor kane la aiti ruh ia ka jingkyrshan ia ka shnong Sankhat, ha kaba u Bah Rymbui ula aiti ia ka Work Order kaba T.5 lak ban shna ia ka surok shnong bad T.2 lak ban tei ia ka kynroh ha RC Sankhat.
Ha kane ka juh hi ka sngi, la aiti ia ka kali Maruti Super Carry sha ka shnong Khonglah ban kyrshan ha ka jinglum jinglang ia ki niut bad ban pynkhlain ia ka sienjam ban pynneh ia ka jingkhuid jingsuba kaba dei ka sienjam kaba la shim da ka Dorbar Shnong.
U Myntri ula pynpaw ia ka jingkyrmen ba kane ka sienjam kan kyntiew ha kaban pynsngewthuh ia ki paitbah bad kan ai mysniem ia ka shnong ka thaw ban pynneh ia ka jingkhuid bad ban ioh ia ka mariang kaba koit ba khiah na ka bynta ki pateng ban dang wan.
