Shillong, Naitung 27: U Myntri ka tnat Social Welfare bah Paul Lyngdoh hynne ka sngi ula sam ei iaki kor iohsngew (Hearing Aids) sha ki paidbah lyngba ka ‘Empowering Voices, Embracing Inclusivity’ haka jingialang bala long ha State Resource Centre jong ka Shillong Civil Hospital.
Haba kren ha kane ka sngi u bah Paul ula ong ba ka long kaba donkam ban iatreilang haka imlang sahlang ban iarap iaki ba don jingeh haka iohsngew bad ula ban jur ruh ba ka long kongsan ban pynthikna ba ka jingduna ka bor ioh sngew kam dei ban long ka mawjynthut ban kiew shakhmat.
Naka liang ka ENT Specialist ka Dr. (Mrs) B Lyngdoh haba kren ha kane ka sngi kala ong ba hapoh ka san snem kila eksamin kumba 79,648 ki ENT Cases.
Naka liang ka Audiologist & Speech Therapist ka Jermica Pyrbot bad ka Commissioner for Persons with Disabilities ka S.B Marak kila pyntip ba ka jingduna ban sam iaki Unique Disability IDs ka pynti ba ka jylla kala sdang hiar ka jingdon kiba don jingduna haka bor ioh sngew.
Kala ong ba ki don 39, 437 ngut kiba don jingduna haka bor ioh sngew, ki don 30,974 ngut kiba don jingthut ha u ryndang bad ki don 9,263 kiba don jingthut ha u khmut.
U HoD Speech Language Pathology Ali Yavar Jung National Institute of Speech and Hearing Disabilities, u Dr. Suman Kumar ula ong ba ki don ki kor katkum ka juk mynta ban iarap iaki briew kiba duna haka bor ioh sngew bad kiwei kiwei de.
