Nongpoh, Naiwieng 15 : U MLA ka Jirang Bah Sosthenes Sohtun haka sngi Thohdieng, ula sam ia ki work order ba mar T. 17 lak sha ki 14 tylli ki Shnong ba kin tei ia ki Children Adolescent & Digital Infrastructure Centre, ban pynioh lem ia ki lad ai jinghikai halor ki kor digital sha ki heprit ha ki shnong ba kham kyndong ka Jirang Constituency.
U MLA ula sam ia kine ki work order ha ka jingialang ba long ha Ophis ka Jirang C&RD Block, ha ka jingiadonlang u Project Director ka DRDA Raja Brahma, u BDO ka Jirang Dr P Hajong bad ki Rangbah Shnong na ki shnong bapher bapher ka thain Ri-Bhoi Sepngi.
Haba ai jingkren, u Bah Sosthenes ula pynpaw ia ka jingkmen ba ka Sorkar Pdeng bad ka Sorkar Jylla da ka jingiatreilang na ka Ophis u DC bad u MLA, kila lah ban pynioh ia kane ka skhim kaba kyrteng ban tei ia ki jaka ai jinghikai shaphang ki kor digital sha ki heprit kiba sah shaki shnong kiba pajih na ki jaka sor, khnang ba kin ioh lem ia ki lad jinghikai kumba ioh baroh.
U la iathuh ruh, ba kine ki shnong kiba la ioh ia kane ka skhim ki dei ki Shnong ba nyngkong eh ha kane ka District Ri Bhoi, kumta u la kyrpad ia ki bor pyniaid shnong ba kin pyndonkam hok ia kane ka skhim ban tei ia ki centre kiba paka kumba la mang ban pynmyntoi ia ki heprit jong ki Shnong ki thaw hapoh ka Jirang C&RD Block.
La pynpaw ruh, ba lyngba kane ka skhim la mang shwa 17, 19, 958 tyngka na bynta ban tei ia ka iing bad yn sa pynlait sa 4 lak tyngka ban pynbit pynbiang pat ia ki tiar kiban pyndonkam ha kane ka Children Adolescent & Digital Infrastructure.
