Shillong, Nailur 5 : Ka Dr. Jasmine Lyngdoh, kyrtong ka NPP na Nongthymmai Constituency hynne ka sngi ka la sam da ki tin sopiing sha ki 34 tylli ki longiing kiba duna ka kamai kajih ba kin lah ban maramot noh ia ki iing ki sem jong ki tang shu poi kane ka aiom rkhiang.
Ia kitei ki tin sop iing kiba ka la pynioh lyngba ka skhim Chief Minister’s Housing Assistance Programme Scheme (CMHAP) la sam paidbah ha ka jingialang kaba long ha Nongrah ha ka jingdonlang u MLA ka Mawryngkneng bad MDC ka thaiñ Bah Pyniaid Sing Syiem kum u Kongsan, Kong Ampareen Lyngdoh MLA bad ruh u MDC ka Laitumkhrah Malki Bah Fantin J Lakadong nalor ki NPP bad NPYF.
Ha kajuh ka por, u Kongsan u la plie ruh ia ka jaka ai jinghikai ba la tip kum ka Routes Livelihood Training Centre na ka bynta ki samla jong katei ka constituency ba kin pyntbit ialade ban pynkhreh bad pynbhabriew ia ki nongiathoh lane ki nongleit khawai kaba dei kawei na ki kam kiba iaid iew bha ha kane ka juk mynta.
U Kongsan ha ka jingkren u la ong ba katei ka sienjam ba ka Dr. Jasmine ka shim kadei kaba paka bha khamtam eh ban eh ban pynioh ia ki tin sopiing na ka bynta ki longiing kiba dei hok ban ioh.
“Phi ioh ka briew kaba thrang shisha ban shakri hok iaphi namar wat im pat long ka nongmihkhmat ruh katne phi la ioh. Kine ki tin sop iing ba phi ioh ma phi ki dei kiba bha bad kiba kham pher na kaba kiwei ki nongmihkhmat ki sam,” ong u Bah Pyniaid.
U ong ruh ba katei ka jaka hikai kan sa long ka jingkyrkhu kaba khraw na ka bynta ki samla kiba kwah ban pyntbit ialade ha ka sap kaba ki la don lypa.
Ka Kong Ampareen MLA ka East Shillong ba dei ruh ka hynmen jong ka Dr. Jasmine ka la ong ba ha constituency jong ka kim ju ioh kum kine hynrei watla katta ka trei borbah hi na ka bynta ban pynioh pat ia ka jingdonkam jong ki paidbah. “Da ki hajar tylli ki iing baduk, da ki hajar tylli ki dukan ngi la thaw na ka bynta ki paidbah. Kiwei kin buh jingkylli ba kumno ka poi ha ka prokram NPP hynrei haba ki leh ia kaba bha nga kum ka nongmihkhmat nga hap ban iaroh bad mih shakhmat.”
Ka Dr. Jasmine ka la iathuh ruh ba ia kitei ki longiing kiba ioh jingmyntoi ki la jied lang hadien ba ki la lap ha ka jingleit iaid iing ha kine ki khyndiat por ba la dep. Ka la iathuh ruh ba katei kadei tang ka jingsdang bad nangne shakhmat kan sa pyntyllun shuh shuh ia ki kam na ka bynta ki duk ki suk kiba don ha ka thaiñ bad khamtam ban plie lad ia ki samla ba kin lah ban ieng ha la ki kjat khlem da ap khmih lynti ia ki kam sorkar.
