Nongstoiñ, Nohprah 23: Ka shlem ai jinghikai kaba la tip kum ka Northeast Institute of Professional Studies, ryngkat ka jingïasnohktilang bad ka ophis jong ka MSSDS ka tnad Labour ka Jylla, ha ka sngi palei, kala sam ïa ki tiar suhjaiñ sha ki katto katne ngut ki samla kiba la shah hikai pyntbit lyngba katei ka shlem.
La ong ba ïa kitei ki tiar la ai sha kiba wan phah hikai ha katei ka shlem, halor ka nongrim ban pynshlur ïa ki ba kin bteng ïa la ki kam lajong, khnang ba kin ym pynsep ei ïa ki sap ki phong kaba ki la ïoh lyngba katei ka shlem bad ba kin nang ruh ban ïeng ha la ki kjat ban seng kam lajong.
Ha katei ka jingïalang, ka kong Memorial Khongkai SDO West Khasi Hills District, ka la long kum ka kongsan bad la synran lang da u bah Thingdar Lyngdoh, uwei na ki nongïaleh Hill State jong ka thaiñ Nongstoiñ kum u symbud kongsan. Katba u samla Michael Thongni u ba dei u nongseng ïa katei ka Shlem u dei u ba la pynïoh ïa kitei ki tiar.
Ïa katei ka jingïalang la pynlong ha ka shlem jong ka Northeast Institute of Professional Studies kaba don ha ka shnong Upper New Nongstoiñ West Khasi Hills District.
U Symbud kongsan u la ong, “Leh ïa kaba dei wat leh tang ïa kaba bha, namar lada phi leh ïa kaba bha phin ym lah ban pynhun ïa baroh. Hynrei lada phi shu leh beit ïa kaba dei long katba long ka kam bad ka jingthmu jong phi kan urlong, phi donkam ruh pynbun kam ïalade ban lait na ki kam sniew”.
I kongsan haba ai jingkren, I la ong, “Ha kum kane ka juk kaba mynta, ka long ka jingïaleh kaba jur. Kawei na kita ka dei ka jingdon jong ki mobile kaba pynbyrngia lyngba ïa kita ki social media bad lada ngim lah ban ïaleh dalade ïalade, ka long shisha kaba jwat. Kaba donkam eh ka long ba phin ïaleh dalade ïalade bad kata ka dei ka thong bad kaba kongsan ha ka jingim u briew bad ngi dei ruh ban da siew spah ïa ka por”.
