Nongpoh, Nailur 05: Ha ka sienjam kaba kham kyrpang, da ka jingthmu ban ialeh ban pynkhlain ia ka jingai jingshakri ki ASHA hapoh ka district, ka sorkar jylla lyngba ka Ophis jongka District Medical & Health Officer, Ri Bhoi District, hynne ka sngi Palei, kala sam da ki Tablet sha ki ASHA jong ka Ri Bhoi District.
Ha katei ka prokram kaba la pynlong ha Conference Hall jong ka DC Office, u Deputy Commissioner ka Ri Bhoi u Abhilash Baranwal ryngkat ka jingdonlang ka DM&HO, kila sam ia katto katne ki Tablet sha ki ASHA kum shi bynta jong ka jingsam Tablet.
Kane ka jingthmu ka long ban kyntiew ia ka jingtreikam bad ka jingshakri jong ki ASHA ban ialeh ha ka ban weng ia ki jingeh kaba ki paidbah ki iakynduh ha kaba iadei ka koit ka khiah, kumta ha kitei ki Tablet la buh ia ki Apps kiba iadei bad ka koit ka khiah, khnang ba ki ASHA kin lah ban pynrung, ban lum ne ban ai jingtip, ban ioh iaki jingtip halor ka koit ka khiah, ban buddien ia ki rekod jongki nongpang bad ban buddien bad kumjuh ban ioh iakren bad ki nongai jingsumar ia ki nongpang.
U Deputy Commissioner haba ai jingkren, ula ong, ba kane ka jingpynkup bor da ki kor ‘Digital’ kan plie lad ia ki ASHA ban ai ka jingshakri kaba kham bha shuh shuh khamtam ha kaban tuklar mardor, ban ioh ia ki jingtip kiba paka, ban nang pynbha ia ka jingmih na ka jingioh jingsumar ki nongpang bad ban iarap iaki ASHA ban don ia ka jingiadei kaba iajan bad ka shnong ka thaw.
