Shillong, Naiwieng 06: U Principal Secretary ka tnad ka koit ka khiah ka jylla u Sampath Kumar ula pynbna hynne ka sngi Balang ba ka jylla Meghalaya kala lah ban pynduna ia ka jingiap jong ki longkmie kiba pun khun da palat 50% ha kine ki 4 snem kiba la dep bad ula banjur ba ka jylla ka iengkut jingmut skhem ban ialeh ban pynduna shuh shuh ia katei ka jingiap ki longkmie kiba pun khun.
“Da ka jingtrei shitom, ngi la sakhi ia ka jinghiar jong ka jingiap ki longkmie kiba pun khun ha Meghalaya bad seisoh ha kaban pynduna haduh palat ia ka 50% ha kine ki 4 snem kiba la dep. Hynrei ka thong ka jong ngi kum ka jylla kadei ban pynduna shuh shuh ia ka” ong u Kumar hadien bala wai ka jingialang ban khmih halor ka Maternal Mortality Rates (MMR) ne ka jingiap ki longkmie kiba pun khun.
U Kumar ula batai ba ka jinglum ia ka jingialang man la ka taiew halor ka MMR kadei kaba la leh ban tip ia kid aw tynrai bad ban shim ia ki sienjam ban iada ha ki sngi kiban wan ia ka jingiap ki longkmie kiba pun khun.
“Lyngba ka jingiai bteng jong ka rukom treikam, ngi shim mardor ia ki sienjam ha man la ki jaka ban ithuh bad ban ai jingiarap. Ka jingim jong man la ki longkmie kiba pun khun ka long kaba kordor bad ngi dei ban pynthikna ia ka jingshngai nka jongki” ula ong.
U Principal Secretary ula kren ruh ha kaba iadei bad ka Chief Minister’s Safe Motherhood Scheme (CM-SMS), ka sienjam kaba la shim da ka jingthmu ban pynduna iaka jingiap ki longkmie kiba pun khun bad ia ki khunlung. Katei ka skhim kala ai iaka jingkyrshan kaba donkam ia ki nongai jingsumar, kaba la pynlah pat ia ki ba kin iada ia ki kmie.
Ula kdew ba katei ka prokram ka la wanrah iaka jingkylla wat ha ki jaka kiba don ha ki thaiñ nongkyndong kiba don sha jngai bha kum ka shnong Purakhasia ha Garo Hills, ha kaba ka Primary Health Center (PHC) ka don 10 tylli ki jaka thiah pang na ka bynta ki longkmie kiba pun khun. Ki kam kila iaid shakhmat na ka bynta ban pynbun ia ki jingdonkam ha ka jingai jingsumar kum ka jingbuh iaka Ultrasound Machine ia kaba la donkam kyrkieh na ka bynta ban ai ka jingshakri.
“Mynshwa, ym shim la don Doctor kiba la ioh jinghikai ban leh iaka Ultrasound ha katei ka jaka. Ngi lah iatreilang bad ka sorkar Tamil Nadu ban ai jinghikai ia ki 60 ngut ki Doctor, kaba mynta kila lehia katei ka kam” la batai u Kumar.
Ula ong, ba kumba 80,000 sien la pynkha khun ha Meghalaya ha ka shi snem bad kane ka dawa jur ban pynkhlain ia ka tnad ka koit ka khiah ha ka jingai jingsumar. Ki jingtip kiba shisha halor ki longkmie kiba pun khun kidei kiba ngi lah don mynta, kane kala ailad ban ioh ia ka jingkitkhlieh bad ban pynbha iaka jingai jingsumar.
Haba iatai halor ka jingmad jingeh ha ki jaka kum ha Ranikor ka bym don ia ki lynti iaid kiba biang bad kaba la buh jingeh bha ha ka por slap, u Kumar ula pyntip baka tnad ka koit ka khiah kala bthah ia ki CHC, Deputy Commissioner bad Block Officer ban buh ia ki Transit Homes. Kine ki jaka kin ai ka jingshngain ia ki longkmie kiba la dei ka por ban kha, na ka jingeh ban poi sha ki jaka ba kin sah bad ban kha khun.
Ula ong, ba ka sorkar jylla kala treikam ha kata ka rukom ban kyntiew ia ka jingkitkhlieh bad ban don ia ka jingshimkhia ia ka kam hapdeng jong baroh ki heh ophisar bad ki jaka ai jingsumar ban lah ban pynneh ia katei ka jingiaid shakhmat.
