Itanagar, Risaw 14 : Ki Bugun Liocichla kiba dei ki jait sim kiba satang ban duh jait noh la iathuh ba la sakhi ia ki ha ki bynta jong ka Eaglenest Pass ha Arunachal Pradesh.
Ia kine ki jait sim kiba phylla la sakhi hapoh Eaglenest Pass ha ka thain sepngi ka Arunachal Pradesh ha ka por ba la pynlong ia ka tamasa kaba shi sngi kynthih ha katei ka jaka.
Kine ki jait sim Bugun Liocichla kiba kham pher ki dei kiba la shem tang hapoh Eaglenest Wildlife Sanctuary ha ka thain sepngi ka Kameng district jong ka Arunachal Pradesh.
La jer kyrteng ia kine ki sim Bugun Liocichla ha ka kyrteng jong ki trai shnong riewlum ia kiba la tip kum ki Bugun hapoh Arunachal Pradesh.Kine ki jaidbynriew Bugun jong ka Arunachal la ong ba ki dei kiba la aijingiada ia kine ki jait sim kiba la jan duhjait.
Katkum ka lad pathai khubor la ong ba ki don satang kumba 14-20 tylli kine ki jait sim Bugun Liocichla hapoh ka jylla Arunachal Pradesh.
Kine ki sim ki shong ki sah ha ka jaka kaba tang kumba 3-4 kilomitar sawdong hapoh ka jaka khlaw hapoh ki shnong kiba dang bat ia ki rukom tynrai ha Singchung kumba 213 km sepngi na Itanagar kaba dei ka nongbah jong ka Arunachal Prdaesh.
Ia ki shijur (kynthei shynrang) jong kine ki jait sim la sakhi ha ka por ba la pynlong ia ka tamasa ‘Bugun Liochchla Festival’ ha ka sngi Balang ba la lah, ong u nongpyniaid jong kane ka tamasa u Naresh Glow lyngba ka lad pathai khubor.
Ia kine ki jait sim la sakhi nyngkong eh ha Arunachal ha ka snem 1005, ha kaba la pynbna ruh ia ki kum ki jait sim kiba thymmai ha ka snem 2006.La shim ba kine ki jait sim ki dei kiba la jan duh jait noh namar ka jingdon kaba tang khyndiat eh.
Shuh shuh ia kine ki jait sim lah ruh ban shem ha kiwei pat ki jaka jong ka Arunachal Pradesh lane ha ki bynta ba marjan jong ka Bhutan.
