“Ngam pat rai iasoh sha kiwei ki Party | Ka INC ka donkam ia u Capten ba biang” : Charles
Shillong, Nohprah 03 : U President ka All India Trinamool Congress (AITC) ha Jylla Bah Charles Pyngrope ha ka sngi Ba-ar ula ong ba u dang ban shong pyrkhat la un leit iasoh noh sha kiwei ki seng sain pyrthei ne kumno namar ka jingshah ieh marwei ha ki Nongialam na Nongthymmai constituency, kiba la leit phai biang mynta sha ka Congress.
Une u MLA ka Nongthymmai ula iai ban ruh ba ka Indian National Congress (INC) ha Meghalaya kala donkam ia u capten uba biang.
Lah ban kdew ba u Bah Charles ula shah ieh marwei ha Nongthymmai Constituency bad baroh ki nongialam kila leit phai biang sha ka Indian National Congress (INC).
“Baroh kila ieh ia nga, ngan lah leh aiu, ngam lah ban khang ia ki” mih ka jingkynthoh na une u Lamphang barim ka Iingdorbar Thaw Ain halor ka jingkylla ka sain hima sima ha ka constituency jong u.
Halor ki khubor ba u lah ban leit iasoh biang sha ka Congress, u Bah Charles Pyngrope ula ong “Ia mynta, ngam pat pyrkhat satia ia kane ka bynta namar nga dang dei u President ka TMC”. Ula bynrap “Ia mynta hi nga long marmei. U Samurai ba khatduh ban ieng”.
Une u MLA ka Nongthymmai ula pynpaw ruh ba haduh mynta um pat shym la iohktien eiei ruh em na ka Congress. “Ym pat ju don ba kren ia nga da mano manor uh la ki dei na ka Congress, NPP, VPP lane ka BJP. Ym pat don ba wan iakren bad nga” ula ong.
Ha kawei ka liang, u Bah Pyngrope ula ong ba ka Congress ha Meghalaya kam pat dei ka jhad kaba la ngam, ka donkam tang ia u capten ua biang.
“Naduh u 2022, nga la ong b aka Congress ka dei ban pynbeit iala ki kam. Namar don kiba kylli ia nga ha katei ka por ba nga ieh ia ka party, ki ong ba ka congress ka dei ka jhad bala ngam, nga la ong ba ka jhad kan nym ngam satia, ka shu donkam ia u capten uba biang, uba lah ban pyniaid bha ia ka jhad”.
Haba kylli la ka congress ka dei ban weng noh ia u Bah Vincent H Pala kum u President ka MPCC, une u MLA ka Nongthymmai ula ong “Ngam dei uei uei ruh ban bishar hynrei ka long kaba kongsan ban bud ia ki rukom treikam. Nga la don ha ka party la 30 snem. Ha ka jingshisha, nga dang shu mih na ka party dang shisnem shiteng mynta”.
Ula pynkynmaw “Ka rukom treikam ha ka riti treikam jong ka Indian National Congress ka long kaba shai bha ba man ki Block, kaba mut man ki Constituency, dei ban don ia u President bad ka kynhun, kiba la jied da ki dkhot, kiba la register bad ka Congress n aka Block, kaba mut 60 kat kum ka rukom treikam”.
U Bah Charles ula ong ba baroh kiei kiei kin sa iaid ha ka lynti kaba beit ia ka congress lad aka bud ia ki rukom treikam kat kum ka riti treikam ka party.
Pyngrope said that everything will fall into place for the Congress once procedure is followed.
Ha kajuh ka por, une u President ka AITC ula kyntait ia ki jingkynnoh ba ka don ka jingiapher jingmut hapdeng jong u bad u Nongialam ka Parliamentary Party bad Myntri Rangbah barim ka Jylla Dr Mukul Sangma.
