Guwahati, Naiwieng 22 : Haduh 41 ngut ki Nongtrei bylla kila sahkut shapoh jong ka tunnel surok bala tip kum ka Silkyara Tunnel kaba don hapoh ka Uttarkashi District jong ka Jylla Uttarakhand.
Kane ka jingtwa ka tunnel kala jia naduh ka 12 tarik Naiwieng bad mynta kala iaid shiphew sngi ha ka jingpyrshang ban sei ia kitei ki nongbylla napoh kane ka tunnel.
Kine ki Nongbylla ki kynthup ia 15 ngut na Jharkhand, 8 ngut na Uttar Pradesh, mar 5 ngut na Odisha bad Bihar, 3 ngut na West Bengal, mar 2 ngut na Uttarakhand bad Assam bad uwei na Himachal Pradesh.
Watla ki dei na ki Jylla bapher bapher, kine ki nongbylla kila iatreilang mynta ban iakhun iala ka jingim hapdeng ka jing pyrshang ruh jong ki Kynhun ai jingiarap na shabar.
Kat kum ka jingiathuh ki borkhmih, ki kynhun ai jingiarap kila lah ban pynrung ia u steel pipe ba 800mm diameter haduh 39 meter eiei shapoh katynner bad ka jingksam (drill) ka dang sah sa 14 meter eiei shuwa ba ka kynhun kan poi sha kine ki nongbylla ba sahkut shapoh.
Lah ban kdew hangne ba iaka jingksam (drilling) la hap ban pynsangeh noh naduh ka sngi Thohdieng haba ka machine kala iatakhuh bad ki kynja tiar ba eh.
Ha ka miet sngi Ba-ar, ki bor khmih kila lah ban pynpoi ia ka bam sha kine ki nongbylla ba sahkut shapoh lyngba ki pipe bala bsuh lyngba ka jaka ba khyllem. Ka bam bala ai ka kynthup ia ki veg pulao, matar-paneer, bad chapatis bala tah bad ka makhon.
Ia kane ka bam la pynkhreh halor ka jingbthah jong ki doktor kiba la kren shai ba dei ban pynduna umphniang bad musla khang ba kan suk ia kine ki nongbylla ba kin bam.
Na ka liang u Myntri Rangbah Duh ka Ri Narendra Modi ula iakren bad u Myntri Rangbah ka Uttarakhand Pushkar Singh Dhami bad pan jingtip halor ka jingiaid ki lad ai jingiarrap sha kine ki nongbylla.
Lah ban kdew hangne ba ka Silkyara Tunnel ka dei kaba jngai kumba 30 km na Uttarkashi bad ba hap iaid haduh 7 kynta da ka kali na Dehradun.
