Nongpoh, Nailar 07 : Da ki phew tylli ki kali, kila shu sniew kynsan bad sahkut ha shiteng lynti ha ka miet sngi Ba-ar ha Umran Dairy, Ri-Bhoi, kaba la jia hadien ka jingthep umphniang na kawei ka petrol pump ba kompani Hisdustan Petroleum ba don ha ka thain.
Ka jingsniew bad jingduh shiteng lynti jong kine ki kali kala jia namar ka jinglap ba ka umphniang ka dei kaba la khleh lang bad ka um.
Ia kane ka jingkhleh um ka umphniang la lap da ki nongshna kali, kiba la shah khot ban shna ia kine ki kali ba sahkut ha Umran. Kila lap ba ka petrol kala dap da ka umjngut suda kaba la pynlong ia ki trai kali ban iatur sha katei ka Petrol Pump ban dawa bai lutksan.
Ki Pulit ka Umsning Police Station haba ioh jingtip ia kane, kila hiar mar mar sha Umran Dairy ban pynlong ia ka jingtohkit bad ban tehlakam ia ka jinglong jingman khnang ba kan nym mih kano kano ka jingjia kaba sngewsih.
Ha ka jingtohkit, u trai ka petrol pump ula kyntait ba u khleh um ia ka umphniang bad suba jur ba kane ka jingdon um ha ka umphniang lehse ka lah ban dei na ka jingioh rung ka umslap ha ka tanky umphniang kaba dang shu dep shna shen.
Halor kane ka jingjia, u trai ka petrol pump ula kular ia ki trai kali ba un siew lut ia baroh ka jinglut jingsep jong ki kali ba sniew bad ula iasoi ruh da ka soskular bad ki trai kali kiba mad ia kane ka apot.
