Shillong, Nohprah 28 : Ka jingiaid survey ba bniah ia ki shnong Khasi-Pnar kiba don ha Block-I, kaba don hapdeng ka jingiakajia pud, kan dang shimpor ban pyndep sa kumba artaiew eiei.
“Ka thong jong kane ka survey ka long ban lum ia ka kyrteng ki shnong Khasi-Pnar kiba don ha kane ka jaka khappud” ong u Symbud Myntri Rangbah ka Jylla Bah Sniawbhalang Dhar uba khlieh ia ka Regional Committee ba iapynbeit pud ka West Jaintia Hills District.
Kane ka survey kala iaid mynta la arbnai eiei. “Sa arbnai kan dang shimpor ban pyndep ia ka survey” ula ong.
Kat kum ka jingong jong u, ki Regional Committee ka Meghalaya bad Assam ki lah ban iakynduh biang ha u bnai Kyllalyngkot jong u snem ban wan.
Ki Khlieh Nongsynshar Shnong bad ki sengbhalang kila dawa ia ka Sorkar Meghalaya Democratic Alliance (MDA-2) ban pynthikna ba baroh 36 tylli ki Shnong kiba hap hapoh Block-I ki dei ban wanphai biang noh sha Meghalaya.
Ka Block-I ka dei kawei na ki hynrew tylli ki jaka ba iakajia pud, ka ba la don hapdeng ka jingiakren jong ki ar Jylla ban iapynbeit noh ia ka jingiakajia baroh.
Ka tyllong khubor ka iathuh pat ba katto katne ki shnong Khasi-Pnar kiba don hapoh u pud ka Assam kila kwah ban rah noh ia ki sha Meghalaya bad ka Sorkar Meghalaya kala shimkhia ban iakren ia kane ruh bad ka Sorkar Assam.
