Shillong, Rymphang 04: Ka Meghalaya kaba la beh nadien iaka Sikkim, kala lah pynban ban pynrem kylla ia ka Sikkim da 6 Wiket ha ka jingialehkai ia ka Ranji Trophy Plate Group ha Rangpo, Sikkim, kaba la long hynne ka Sngi u Blei.
Haduh hynnin ka sngi, ka Sikkim kala leit tied haka sien ka baar, kala kamai 55 run bad hap 4 wiket bad kala tam iaka Meghalaya da 148 run.
U Aryan Borah ula shim 3 wiket katba u Akash Kumar Choudhury ula shim 1 wiket.
Haba ka Sikkim kala bteng ban tied biang hynne ka sngi, ki nongtied kim shym la lah ban shan slem ha u Aryan ha kaba ula pynhap ia baroh 4 ngut ki nongtied jong ka Sikkim.
U Aryan ha baroh arsien jong ka jingleit kawang bol ula ioh ban khur 8 wiket bad ai 36 run bad haba kyllum lang ia ka jingleit kawang bol baroh arsien ha ka jingiakhun ula ioh khur 12 wiket bad ai 129 run bad ula ioh ruh iaka nam Player of the Match.
Ka Sikkim kala tam lypa da 93 run iaka Meghalaya bad kala tied haka sien ka baar bad buh iaka Meghalaya ia ka jingdonkam ban kamai 174 run ban jop iaka jingialehkai.
U Lee Yong Lepcha, uba la pynhap 5 ngut ki nongtied jong ka Meghalaya haka jingialehkai ha ka wat kaba nyngkong hynne ka sngi pat ula ioh shim 2 wiket.
Ka Meghalaya kala kamai 54 run bad hap 3 wiket bad ha kane ka por la mih madan lang u Kishan Lyngdoh bad u Jaskirat Singh Sacheva ha kaba kila kamai 108 run ban pynthikna ba ka Meghalaya kan kham suk ban ioh ia ka jingjop.
U Kishan ula kamai 69 run, katba u Jaskirat ula kamai 44 run bad ym shim la out, katba u Akash Kumar Choudhury ula kamai 10 run bad ym shim la out haduh ban da pynjop syndin iaka Meghalaya.
Ka Meghalaya kala jop 3 sien bad rem 2 sien ha ka round robin bad mynta kala ioh rung sha ka Semifinals kum ka kynhun kaba wan baar bad baroh ar tylli ki Semifinal kin sdang naduh ka 9 tarik u Rymphang.
