Shillong, Rymphang 04: U Nishanta Chakraborty jong ka Meghalaya ula kamai 119 run bad ym pat out satia bad ka Meghalaya kala tied 261 run bad hap 7 wiket ha ka sngi sdang jong ka jingiakhun ia ka U-23 Men’s Col CK Nayudu Trophy pyrshah iaka Nagaland kaba la long ha MCA Ground hynne ka sngi u Blei.
Ka Nagaland kala jied ban bol nyngkong, ha kaba u nongtied ka Meghalaya u Mrityunjay Bharali’s ula out haka over kaba nyngkong duh bad la out sa u Kush Agarwal ha ka over kaba 12 hynrei u Nishanta ula neh beit bad kylla long kum u maw uba kshem iaka kynhun haduh ban da kut.
U Nishanta ula kamai tang 8 run bad 0 run (duck) pyrshah iaka Arunachal, hynrei hynne ka sngi ula lah ban kamai 119 run khlem out bad kane kadei ruh lyngba ka jingioh jingkyrshan na u Swastic Chettri uba la kamai 55 run.
Kiwei kiwei ki nongtied kiba la mih hadien kim shym la lah ban neh slem ban ai jingkyrshan ia u Nishanta bad kila out kloi noh, katba u PM Santosh ula kamai 24 run.
U nongkawang bol ka Nagaland u Neizekho ula ioh khur 3 wiket bad lashai ka sngi ka Meghalaya kan bteng biang ban tied haka sngi ka baar.
