Rung ka Jingkieng diengjri ha ka thup ban ithuh kum ka World Heritage ka UNESCO

SHILLONG, JAN 29: Ka jingphah ia ka jingtyrwa ne Nomination ban pynrung ia ka “Jingkieng Jri/ Lyu Chrai Cultural Landscape, Meghalaya” la aiti ha u HE Vishal V Sharma, Ambassador/Permanent Representative of India sha ka UNESCO to Lazare Assomo Eloundou, Director of UNESCO’s World Heritage Centre ban ialeh ban pynrung ha ka thup jongka UNESCO World Heritage ha u snem 2026-27.

Haba aiti ia katei ka jingtyrwa, u Nongkit Tiensyiem u Ambassador Vishal V Sharma ula ai khublei ia u Myntri Rangbahduh ka ri u Narendra Modi, u Myntri ka Sorkar Pdeng uba khmih ia ka Kolshor u Gajendra Singh Shekhawat, u Myntri Rangbah ka jylla Meghalaya u Conrad K Sangma, u Principal Secretary u Bah FR Kharkongor, ki ophisar jongka Achaeological Survey India, Ministry of External Affairs, ki riewstad bad ki shnong ki thaw kiba iada ia katei ka jingdon jingem jong katei ka jaka kaba don nam ha ka histori.

Ka Jingkieng Jri ka don ha kylleng ka rilum Khasi bad Jaintia jong ka jylla Meghalaya, kane ka jingphah ia ka jingtyrwa kadei kaba pyni ia ka jinglongtrai ia ka jinglong jingman ka kolshor kaba im kaba la don naduh ki por hyndai hynthai da ki paid Khasi bad Jaintia. Kane ka jinglong jingman jong ka sawdong sawkun ka pyni ia ka jingiadei naduh tynrai bad ka jingbha jingmiat ka jingiadei hapdeng ki paitbah bad ka mariang bad ka jingeit kaba la pyniasoh ha ka rukom pyndonkam tynrai ia ki jaka, ka synshar khaddar bad ka jingshimkhia ia ka sawdong sawkun jong ka mariang.

Kaba longpdeng eh jong kane ka sawdong sawkun jong ka kolshor kadei ka jingiohi jngai ha ka pyrthei da ki trai ri kaba la lamkhmat ha ka nongrim jong ka jingburom, jingmyntoi lang bad jingkitkhlieh ia ka Mei Ramew.

Ka jingaiti ia katei ka jingtyrwa ka pyni ba ka ri India ka don ia ka jingkitkhlieh ban ithuh bad iada ia ka kolshor kaba riewspah bad ia ka jingioh pateng naduh hyndai hynthai khamtam eh ka riti dustur kaba dang im bad ka jingshemphang jong ki jaidbynriew trai ri trai muluk bad ban kiew shaphrang ha ka pyrthei ban shim ia ki sienjam ban iada ia ki jinghiar pateng kiba naduh ki por hyndai kulong kumah lyngba ka UNESCO.