Shillong Jymmang 29: Ka Drug Reduction, Elimination, and Action Mission (DREAM) jong ka sorkar jylla kala nang pynjur ia ka jingiakhun pyrshah ia ka jingkynrei u droks, da kaba bteng ban rung khlieh sa sha ri lum Garo.
Ha ka sngi Balang, la pynlong ia ka jingialang kaba la lum da u Mission Director jong ka DREAM u Bah FG Kharshiing ha ka Conference Hall jong ka ophis treikam u Superintendent of Police, West Garo Hills District.
Ha kane ka jingialang la sakhi ia ka jingwan iashimbynta jong kiba bun balang naduh u Superintendent of Police (SP) ka West Garo Hills, Additional Deputy Commissioner, SP Traffic, District Social Welfare Officer, ki Psychologist, ki nongsumar ia kiba don jingduna ha ka bor pyrkhat, ki nongialam shnong, ki nongialam balang, ki Nokma, ki dkhot jong ki Village Development Council bad ki nongmihkhmat na ki kynhun sengbhalang.
U Bah Kharshiing ula banjur ia ka jingdonkam ban shim ia ki sienjam kiba bun ban lah ban shimkhia ia ka jingkynrei u droks.
Ki mat kiba kongsan kiba la iatai ha kane ka jingialang ki kynthup ban ym khein ne kren bein ia kiba pyndonkam ia u droks, ban kyntiew bad ai jingkyrshan ia ki riewshimet kiba la shah ktah na une u jingdih uba sniew bad ban pyndonkam ia ki kor teknoloji. Ban pyntreikam ia ki prokam ai jinghikai pyntbit, ki Vocational Training na ka bynta ki samla ba kin ioh ia ka lad ban kamai jakpoh bad ban seng kam lajong kaban long kum ka sienjam ba kin lah ban kiar na ka jingpyndonkam ia u droks.
U Bah Kharshiing ula ong ba ka jingiakhun pyrshah ia kiba pyndonkam droks ka long palat ia ka jingpynjari ia ka ain, kadei ka jingeh kaba mad da ka imlang sahlang baroh kawei, kaba donkam ia ka jingshimkhia bha da baroh ki nongshong shnong.
Ula kyntu ia baroh ki riewshimet ba kin noh synniang ha la ka long ka bynta kaba rit eh ruh na ka bynta ban pynurlong ia ka thong ban pynlong ia ka jylla Meghalaya kaba lait na u droks.
U Director ula ong, ba ka prokram ha Garo Hills kadei shi bynta jong ka jingshim sienjam jongka DREAM projek ban pyndonbynta lang bad baroh ki district jong ka jylla bad ban lum ban ban lang ia ki kum ki nongiashimbynta kiba shitrhem ban iatreilang ban rat dyngkhong ia u droks.
Ka Sorkar Meghalaya ka iengskhem ha ka jingkular ban pynduhjait ia ka jingkynrei u droks bad ban pynlong ia ka sawdong sawkun kaba koit ba khiah bad kaba baroh ki nongshong shnong ka jylla kin lait na u droks, ula bynrap shuh shuh.
 jong ka sorkar jylla kala nang pynjur ia ka jingiakhun pyrshah ia ka jingkynrei u droks, da kaba bteng ban rung khlieh sa sha ri lum Garo.){kind=link}