Shillong, Rymphang 19: U Myntri Rangbah ka jylla Conrad K Sangma ha ka sngi Palei ula pynksan ia ka Ride Shillong Electric-Bike hadien ba u dkhot ka Liang Pyrshah na ka seng VPP Bah Adelbert Nongrum ula niew ba ‘ka long kum ka jingtei ia ka jingkieng khlem ka wah’ bad ka dawa ban ai ia ka jingkhein jingdiah.
“Ka jingthmu jong ka Tnad Urban Affairs bad ka Sorkar baroh kawei ka long ban wad ia ki lad ki lynti ban shimkhia ia ka jingdheng kali bad ngi pynshlur ia ka leit ka wan kaba lah ban iai neh” ong u Sangma hapoh ka iingdorbar thawain.
“Ka rukom pyrkhat kaba iaid (ha ka jingmut jong u dkhot) ka dei kaba khanglad ia ka jingleh kaba long thymmai. Kum ka sorkar bad ka imlang sahlang, ngi donkam ban pyrshang, ban leh ia kaei kaei kaba long thymmai bad ban wad ia ki lad ki lynti”.
Ula ban jur ba ym shim la pyndonkam satia ia ka pisa jong ka sorkar jylla.
“Nga lah kren shai ha ka jubab ka jong nga, ba ym shim la pyndonkam ia ka pisa jong ka sorkar, kane kadei ka Grant kaba la ai da ka kynhun ne Agency na Germany namar ba ngi kwah ban kyntiew ia ka jingniah saikil bad ban iaid kjat. Haba kane kan urlong kan hiar ka jingkhapngiah bad ka jingdheng kali”.
U Sangma ula pynpaw ba kila don 1,600 ngut ki briew kiba la pyndonkam ia ki bike bad ha ka surok New Shillong kan kynthup ruh ia ka jaka ban niah ia ki saikil. “Hooid, ka jingai jingmut u dkhot ka long kaei kaei kaba lah ban pdiang, hynrei ban peit bad ban kynthoh ia kaei kaba ka sorkar ka leh kadei ka rukom pyrkhat kaba donkam ban kylla noh, Lada phi lap ia ki jingeh, ai ia ki jingai jingmut, ngan long uba kmen tam ban pynrung ia ki”.
Hashwa kane, haba ai ia ka jubab na ka liang u Symbud Myntri Rangbah uba khmih ia ka Urban Affairs u Bah Sniawbhalang Dhar ula pynthikna ba kam don kano kano ka jingbhah tyngka na ka bynta katei ka projek bad ka bynrap ba kila don 20 tylli ki saikil elektrik kiba la aiwai lyngba ka sienjam jongka Sustainable Urban Mobility – Air Quality, Climate Action and Accessibility (SUM-ACA), kaba la pyntreikam da ka jingkyrshan na ka Germany’s GIZ. U contractor uba la shah pynkhamti dei na ka Chartered Bike Pvt Ltd na Ranchi, Jharkhand.
U Bah Dhar ula ong, ba ka jinglong jingman kaba mynta ki surok ha Shillong kam don satia ia kano kano ka lynti kaba kyrpang ia kiba niah saikil hynrei ha ki surok bathymmai jong ka Shillong kin sa don.
“Ngi lah iakren bad ka tnad PWD, ba ia ki jaka niah saikil ne Cycling Tracks kadei kaba la mang ha baroh ki surok ha New Shillong.”
Haba u Bah Nongrum ula kylli la ia ka CM’s Launch Ride la pyndonkam ia ka lynti iaid kaba kyrpang ne Dedicated Lane ne ka Main Road, u Bah Dhar ula jubab ba kam shim la don kano kano ka surok kaba la bhah kyrpang, ha katei ka jingsdang la shah ia baroh ki nongniah da kaba bud ryntih ia ki kyndon niah kali”.
Haba kylli la ki don jingthmu ban pyniar ia kane ka project, u Bah Dhar ula ong ba yn sa khmih bniah ia kane ka jingai jingmut”.
