Shillong, Risaw 03 : U Secretary ka Bethany Society Carmo Noronha ha ka sngi Palei, ula ong ba ka State Reservation Policy ba thymmai kam dei ban kyntait ia ka 4% ka bhah iohkam jong ki briew kiba don jingduna ha ki dkhot met hapoh ka Jylla Meghalaya.
Ka Bethany kala kdew ba ka 4% ka kynthup 1% ia kiba duna haka bor khmat (Visually Impaired), 1% ia kiba duna haka bor ioh sngew (Hearing Impaired), 1% ia kiba duna haka bor ban iaid (Locomotor Impaired) bad 1% ia kiwei kiwei.
Hadien ba leit pynsngew ia ki jingai jingmut hakhmat ka Expert Committee halor ka State Reservaton Policy, kaba la pynlong ia ka Public Hearing ha Shillong, u Noronha ula ong “Ka mat kaba ngi pynsngew ka long b aka State Reservation Policy ka dei ruh ban iaid ryngkat bad ka Rights to Persons with Disabilities Act, 2016 bad ruh ka Meghalaya State Policy for Empowerment of Persons with Disabilities. Baroh kine ki Policy bad ka Ain ki pynthikna ia ka jingdon 4% ka bhah ha baroh ki kam Sorkar ia ki briew ba duna dkhot met”.
“Ki mat ba ngi la pynsngew kim don jingpher ia kaei kata ka State Policy, ka State Policy kam dei ban kyntait ia ka 4% ka jingai bhah namar ia mynta ka 4% ka bhah, ka Sorkar ka dang pyrshang ban pyntreikam ia ka hynrei kam pat pyntreikam bad ngi sngew ba ka dei ban don ruh ka jingai bhah ha ki District ia ki briew ba duna dkhot met kat kum ka Ain bad kat kum ka kyrdan pule jong ngi bad ka kam kiba lait” ula bynrap.
Haba kylli halor ka jingdon paid ki briew ba duna dkhot met, u Noronha ula ong “Kat kum ka khana samari, ki don kumba 2.1% hynrei ngi ngeit ba ki dang kham bun ban ia kata….Lada phi iaid kat kum ki samari ki ri ka pyrthei bad kiwei kiwei, ka lah ban kot hapdeng 8 haduh 10% hynrei ka Sorkar kala iaid da ka jingkhein jong ka samari, kaba long 2.1%. Kane ruh ka dei kawei ka jingeh halor ka jingithuh ia ki briew ba don jingduna dkhot met”.
