Shillong, Nailur 08 : Ka Sorkar Jylla kala rai ba shen kan sa shim ia ka rai halor ki jingai jingmut bapher bapher jong ka Expert Committee halor ka State Reservation Policy.
“Ka Kynhun Myntri hynne ka step kala pdiang ia ka kaiphod bad ki jingai jingmut bapher bapher bad kala rai ba kan sa shong bishar noh mardor ia ka kaiphod. Ka dei ka kaiphod kaba bun sla bha, kaba kot da ki hajar sla. Ngin shim ia ka por ban pule bniah ia ki jingai jingmut bad ngi dei ban lah ban shim ia ka rai halor ki jingai jingmut bapher bapher ka Committee hadien ba ngi dep bishar bniah ia ki” ong u Myntri Sorkar Bah Paul Lyngdoh haba iakren bad ki lad pathai khubor hadien ka jingialang jong ka Kynhun Myntri ba long ha ka sngi Nyngkong.
Ula ong ba ka kaiphod ka don bun bah ki jingai jingmut, katto katne ki dei kiba thymmai bad ki kynthup ia ka jingkhmih lang ha ka liang ka ioh ka kot.
“Ngi don mynta ha ka khep ba ngi dang shu ioh pdiang ia ka kaiphod. Ngi la shimkhia ia ka kaiphod bad ngin sa shim ia ka rai kum ka kynhun Myntri halor ki jingai jingmut bapher bapher” ong u Bah Paul haba pynpaw ba ki don ki mat kiba la pynhap ha ka status quo bad ki don ruh ki mat kiba dang thymmai.
“U Chief Secretary ula ai ka jingbatai sha ngi hynne ka sngi lyngba ka kaiphod jong u bad kum ki dkhot ka Kynhun Myntri, ngi ruh ngi don la ki jong ki jingkylli bad ki jingpynsngew bad ki mat, kiba donkam ia ka jingpynshai..kumta, ngin shim katto katne por hashuwa ba ngin shim rai halor ka kaiphod” ula bynrap.
U Myntri ula ong ba ka Sorkar ka don ia ka bor ban pdiang ne ban kyntait ia ki jingai jingmut, bad ia ka rai yn sa shim hadien ka jingbishar kaba bniah bad ka jingiasyllok.
Ula ban jur ba ka Sorkar kan shim ia ka lynti kaba pynbiang tarajur, haba buh hakhmat ia ki jingai jingmut jong baroh ki kynhun.
“Ngi ju niew ryngkat ia baroh bad ngin nang iaibteng ban leh ia kane. Hooid, ka Sorkar ka don ia ka lynti ban pdiang ne kyntait ia ki jingai jingmut. Hynrei khatduh, ki jingai jingmut ki dei tang ki jingai jingmut hynrei ka rai ba khatduh hi ka dei jong ka Sorkar Jylla” ula ong.
