Shillong, Jymmang 15 : Ka Voice of the People Party (VPP) hynne ka sngi Nyngkong kala pynbna ia ka rai ban pynlong da ka jingiashong kyllain mungor (sit-in-demonstration) ha ka 17 tarik Jymmang, kum ka dak ban pynpaw ia ka jingpyrshah ia ka jingsngap mynthi ka Sorkar ia ka jingdawa ban pynsangeh shuwa ia baroh ki jingthungkam tad haduh da dep bishar thymmai ia ka Reservation Policy.
“Namar ka jingling mynthi bad jingsngap jar jar jongka Sorkar mDA-2, ia ka jingdawa ka VPP halor ka jingdawa ban pynsangeh shuwa ia baroh ki jingthungkam ha Jylla tad haduh da dep bishar thymmai ia ka State Reservation Policy bad Roster System da ki Committee ki riew shemphang, ka Party kan pynlong ia ka jingiashong kyllain mungor ha jaka pynieng kali marjan ka Additional Secetariat ha ka 17 tarik naduh ka por 10 baje mynstep haduh 4 baje janmiet” ong u Nongaiktien ka VPP Dr Batskhem Myrboh ha ka kyrwoh.
Ia kane ka rai la shim hadien ba ka jingaipor ba 48 kynta ia ka Sorkar kala kut noh hynne ka janmiet.
U Dr Myrboh ula ong ba ka party ka kyntu ia ki Nongtrei ka party bad ia ki paidbah ba kin wan iashim bynta ha kane ka jingiakhih ban pynbor ia ka Sorkar Jylla.
Ha ka 12 tarik Jymmang, ka VPP kala aiti ia ka shithi sha u Myntri Rangbah ka Jylla Conrad K Sangma hadien ka jingialang paidbah bala pynlong ha ka jaka ieng kali ba marjan ka Additional Secretariat.
Ha kane ka jingialang, u President ka VPP Bah Ardent M Basaiawmoit ula ong ba ka party kam don lad pat da kumwei hynrei ban khot pynlong da ki jingiakhih bapher bapher pyrshah ia ka jinglong mynthi jong ka Sorkar ba kan pynsangeh shuwa ia ki jingthungkam thungjam ha Jylla.
Ula ong ba kane ka dei ka shithi kaba ar ba ka VPP kala phah sha ka Sorkar hadien ba kam shym la jubab ia ka shithi ba nyngkong ba dawa ban khot pynlong ia ka Dorbar Kyrpang jong ka Iingdorbar Thaw Ain na ka bynta ban iakren ia kane ka kam.
