Shillong, Risaw 03 : Ka Khasi Students Union (KSU) kala ban jur ba ka State Reservation Policy ba thymmai ka Jylla ka dei ban mynjur ha kaban ai 50% ka bhah thungkam sha ki Khasi-Jaitnia, 40 % sha ki Garo, 5 % sha kiwei ki Scheduled Tribe bad 5 % sha ki Unreserve.
Ka KSU kala buh hakhamt ia kane ka jingai jingmut hakhmat ki dkhot ka Expert Committee on the State Reservation Policy, kaba la pynsdang ia ka Public Hearing b alai sngi, hynne ka sngi Palei ha Nongbah Shillong.
“(Ha ka jingiakren jong ngi bad ka Expert Committee, ngi la ai jingmut ba) lada iaid (jingai bhah) kat kum ka jingdon paid, ngi sngew ba ka jingsam bhah hapdeng ki Khasi bad ki Garo ka dei ban long 50% ia ki Khasi-Jaitnia bad 40% ia ki Garo, 5% ia kiwei ki ST bad 5% ia ki Enreserve. Bat ia ka jingkren jong nga, kam dei kyllum lang hynrei ka Unreserve ka mut ba plie lad ia baroh” ong u General Secretary ka KSU Donald V Thabah hadien ka jingialang.
“Kawei pat ka jingsngew ka long ba lada kane (ka jingtyrwa) kam lah ban urlong, kumta ia ka (jingai bhah) dei ban long noh 90% kaba mang kyllum lang na ka bynta ki Khasi, Jaintia bad Garo, 5 % ia kiwei ki ST bad 5 % ki Unreserve. Kine ki dei ki artylli ki jingai jingmut ba ngi la buh hakhmat ka Committee” ula bynrap.
U samla Donald ula pyntip ruh ba ka KSU kala ai jingmut ba “Lada dei ban pynmih ia ka Reservation Policy ba thymmai, ka policy kam dei ban treikam naduh ki snem bala leit noh, kam dei ban long ka backlog, ka dei ban long beit kaba thymmai, ka dei ban sdang thymmai beit”.
Nalor kane, une u Nongialam ka KSU ula ong ba ka seng kala tyrwa ruh ban ai bhah beit ba mar 100 % ha ka thungkam ia ki Nonghikai jong ki skul Primary hapoh ka Jylla na ka bynta ki Khasi Jaintia ha Ri-lum Khasi Jaintia bad kumjuh ruh ia ki Garo ha Ri-lum Garo.
“Ka jingai jingmut kaba khatduh ka long namar ba ngi ngeit ba ha ka pule puthi, ka bhah thungkam ruh ka don jingiadei bad ka long kaba kongsan ba haba ngi ai jinghikai sha ki Khynnah ha ki skul Lower Primary bad Primary, ngi hap ban kren bad hikai ia ki khynnah dala ki jong ki ktien lajong” ula ong.
“Kumta ngi la ai jingmut ba ha Ri-lum Garo, 100 % ka bhah ia ki nonghikai ka dei ban leit sha ki Garo bad kumjuh ruh ha Ri-lum Khasi Jaintia, 100% ka bhah ka dei ban leit sha ki Khasi bad Jaintia. Ngi sngew ba ki Garo kin ym lah ban hikai ia ki khynnah Khasi da ka Khasi lada ngi iaid da ka 40:40 ne 50:40 lane ki Khasi kin leit sha Garo ban hikai da ka ktien Garo ia ki Khynnah Garo. Na ka bynta ka jingjanai ha ka pule dangle, ngi la ai jingmut ba kane ka 100% ka bhah ia ki Nonghikai ha ki skul Lower Primary, Primary bad skul SSA” ula bynrap.
