Shillong, Jylliew 14: Ka Hynniewtrep Youth Council (HYC) hynne ka sngi Thohdieng kala ai jingmut ba dei ban bhah noh 90% da kaba kyllum lang ia ki jaidbynriew riewlum Scheduled Tribes (ST) jong ka jylla.
“Ngi don ia ka jingsngew ba lada ka Supreme Court ka shim ba ka sub-classification jongki ST/SC kadei kaba long katkum ka riti synshar ka ri bad kaba shong nongrim, kumta da kaba peit ia ka jingdon jong ki paid Khasi-Jaintia, ka jingbhah kadei ban long 50%, bad dei ban pynneh ba ki Garo kin ioh beit 40% katba kiwei pat kiba hap ha ka kyrdan ST dei ban bhah 3%. Lada ka sub-classification jong ki ST/SC ka long pyrshah ia ka riti synshar ka ri bad kaba be-aiñ katkum ka jingsngew jongka Supreme Court, ngi don ia ka jingsngew ba ka jingbhah kaba kyllum lang kadei ban long noh 93% na ka bynta ki ST ha ka jylla, 2% ia ki SC bad 5% na ka bynta ka Unreserved Category,” pynpaw u President ka HYC u Roykupar Synrem ha ka shithi kaba la phah sha ka Expert Committee halor ka State Reservation Policy.
“Ha ki kam kiba lait ha ki District Level, ngi don ia ka jingsngew ba dei ban pynneh ia ka jingbhah lang na ka bynta ki ST. Ka jingbhah ka dei ban kiew sha ka 93% iaki ST ha ka jylla ha ki District, 2% ia ki SC bad 5% ha ka Unreserved Category,” ula pynpaw.
Ula pynpaw ruh ba ka SRP kala kynthup lang ia ki ST bad SC ha kawei ka kyrdan, nuksa, kiwei pat ki ST bad SC la kynthup lang hajuh na ka bynta ka jingbhah kaba 5%.
U Bah Synrem ula ong, “Ngi don iaka jingsngew ba kane ka long kaba be-aiñ bha bad ngi ai jingmut ba dei ban pynduh noh ia kane bad ka jingbhah ia kiwei pat ki ST bad SC jong ka jylla dei ban ai noh 3% ia kiwei pat ki ST bad 2% ia ki SC ha ka jaka jongka jingbhah lang kaba 5%”.
Ka HYC kala ai jingmut ruh ia ka jingdonkam ban pynbiang ia ka jingbhah ia ki kam Casual Workers, Contractual bad Non-Permanent Employees kiba trei ha ki tnad bad karkhana jong ka sorkar bad lada ka jingtreikam ka long palat ia ka 30 sngi bad lada ka don ka lad ban pynthymmai ne pynjlan ia ka por jong ka jingtreikam.
Kila pynpaw ruh ha kaba iadei bad ka jingmut Scientific Services & Posts dei ban ai ka jingbatai kaba bniah bad ka long ruh kaba donkam ban buh kyrdan ia ki Jobs/Services/Posts kiba lah ban don kyrdan hapoh jong ka Scientific Services & posts.
Nalor kane, ka HYC kala ong ba ka long kaba donkam ban pynduh noh ia ka kyndon ban pyniaid shakhmat ne ‘carry-forward’ ha kaba iadei bad ki snem jong ka jingpynrung kam lada ym lah ban pyndep ia kano ka Reserved Category ha ka por ba don ka jingpynrung kam bad ia kitei ki kam kiba thylli dei ban thep noh na kawei pat ka Reserved Category da kaba pynshong katkum ka jingwan shakhmat ne Merit.
Kala pynpaw ruh ba ka kyndon ha ka Policy kaba ailad ban don iaka Special Recruitment na ka bynta ban jied ia ki kyrtong na ka Under-Represented Groups dei ban pynduh noh bad ka bynrap ba ka jingbhah ia ki Posts bad Services ha ki ‘Public Undertakings and Government Aided Institutions’ dei ban pynneh beit kumjuh.
“Ka kyntien “Government Aided Institutions” ym shim la batai bniah kumta donkam ban batai bniah. Lada ki skul kum ki SSA, ADHOC bad Deficit la kynthup kum ki Government Aided Institutions. Ngi don ia ka jingsngew ba 93% ka jingbhah lang ne Combined Reservation na ka bynta ki ST, 2% ia ki SC bad 5% ia ki Unreserved Category dei ban bud ha ka jingthep kam” la pynpaw ka HYC.
Nalor kane, ka HYC kala ong ruh ba ka sorkar jylla kadei ban thaw iaka aiñ la ka jong na ka bynta ka jingbhah kam na ka bynta ki nonghikai ha ki jaka pule jong ka sorkar bad ki jaka pule kiba kyrshan da ka sorkar hapoh ka jylla.
“Ngi don ruh ia ka jingsngew ba ka sorkar jylla kadei ban pyntreikam da la ka jong ka aiñ ha kaba iadei bad ka jingbhah ha kaban ioh ia ka admission ha ki jaka pule ban ioh bteng ia ka jingpule ha ki kyrdan kiba halor shabar jong ka jylla lyngba ka bhah sorkar. Lada ka sorkar ka thaw da la ka jong ka aiñ halor katei ka bynta, kumta ngi don ia ka jingsngew ba dei ban bhah lang ia baroh 93% ne combined reservation ia ki ST, 2% ia ki SC bad 5% ia ki Unreserved dei ban bud” la pynkut ka HYC.
