Tura, Jylliew 15 : Katba ka jingiatai ka dang thnem bha halor ka jingpynthymmai ia ka Job Reservation Policy hapoh ka Jylla, ki bar jylla trai Jylla ba sah ha ki jaka them ka Ri-lum Garo, kila mih pyrthei ban dawa pynrung lem ia ki hapoh ka bhah jong ka Jylla.
Kine ki bar jylla ki kynthup ia ki paid Muslim, Hindu, Bihari, Nepali bad kiwei kiwei.
U MDC barim ka GHADC Sofior Rahman ula thoh sha ka Expert Committee bad ai jingmut ba ki Muslim, Hindu, Bihari, Nepali bad kiwei ki bar jylla trai jaka (Indigenous Non-Tribal Community) ki dei ban shah kynthup lang ha ka jingsam bhah da kaba phiah n aka 7.5% jong ka 15 % ba buh ia ka Open Category.
Ia mynta, ka State Job Reservation Policy ka ai bhah ba 40% ia ki Khasi Jaintia, 40 % ia ki Garo, 5 % ia kiwei ki riewlum bad 15 % ia ka General Category.
“Watla ngi mynjur bad ka Policy jong ka Sorkar ban ai biang tarajur ia ki riewlum kiba dei ki hynmen ki para hynrei, kam shym la don satia kano kano ka kyndon ia ki bar jylla kiba dei ki trai nongshongshnong ka Meghalaya. Wat 46 snem ba ioh iala ka Jylla, ka percentage ba ioh kamki bar jylla ha ki Ophis Sorkar/Semi government kynthup ki skul bad college kam pat kot satia ia ka 0.5% haduh mynta” ong u Rahman haba bynrap ba ka jingdon paid jong ki bar jylla hapoh ka Jylla kala jan kot ia ka 1.50 lak, ha kaba bun ki dei ki muslim.
Haba niew ia kine ki jaidbynriew kum kiba dang sahdien eh ha ka imlang salang, ka ioh ka kot bad ka pule dangle, u Rahman ula ong ba ka kaiphod jong ka National Statistical Office ka kdew ba ha ka pule dangle, ki muslim ki dang shadien bah wat ia ki Scheduled Caste bad Scheduled Tribe.
“Lada ka Sorkar Meghalaya ka kynthup ia 7.5% ka bhah ia ki bar jylla, ki llah ban buh ia ngi ne khein ia ngi kum ki OBC category lane ki Economically Weaker Section (EWS) category” ong une u MDC barim.
 ki dei ban shah kynthup lang ha ka jingsam bhah da kaba phiah n aka 7.5% jong ka 15 % ba buh ia ka Open Category.){kind=link}