Shillong, Jylliew 26 : Ka Meghalaya State Commission for Women (MSCW) kala shim suo moto case halor ka jingshah shoh tohmet kawei ka kynthei ha ka shnong ka West Garo Hills District.
Ka kyrwoh bala pyllait hynne ka sngi Balang ka ong ba ka Commission kala pynrem jur ia kane ka jingshoh tohmet ia kane ka kynthei ha ka shnong Teksragre .
“Ka Commission kala shim ia ka suo moto case halor kane ka jingjia bad hynne ka janmiet, ka Vice Chairperson ka MSCW bad ki dkhot, kila iakynduh ia u Superintendent of Police, West Garo Hills ban tohkit bniah bha ia kane ka jingjia bad ula pyntip ia ka Commission ba ki Pulit kila dep kem ia ki briew ba donkti” kala ong.
Ka Commission kan sa leit iakynduh ia kane ka lanot bad kan sa nang buddien ban shim rai ia kaei kaba dei ban leh.
Ka video kaba la saphriang paidbah, ka pyni ia ki shynrang jong kane ka shnong kila bom naphang ia kane ka kynthei da u siej bad patrong ia u snieh wat hapdeng ka jingiam, lyniar bad jingkyrpad ia ki ba kin sangeh.
