Shillong, Iaiong 19: Kawei ka kali kaba la pynher sted bha, kala leit tynrah ia artylli ki scooty hynne ka step sngi Palei por 10:30 baje mynmiet ha jan Bawri Mansion Junction Shillong bad phet syndon na katei ka jaka.
Ka khubor na ki pulit ka iathuh ba katei ka kali EcoSport (Ford) kaba don ia u number ML 05 P 2414, ka dei kaba wan iaid na Dhankheti sha Malki hynrei marsien poi hajan Woodland Hospital ,u nongñiah u la tynrah ar tylli ki scooty bad kiwei pat ki kali.
La iathuh ruh ba ha ka jaka ban sangeh, u nongniah kali u la pynher iaka kali bad phet syndon na katei ka jaka hadien ba ki briew ki la pyrta bad pyrshang ban beh iaka kali.
La iathuh ba kane ka kali kala phet noh sha Barik bad phai sha ka surok kaba leit sha Phan Nonglait (Lady Hydari) Park, ha kaba u la iehnoh ia ka kali bad phet krad na katei ka jaka.
Naka liang ki pulit ki la pyntip ba ki artylli ki scooty kiba shah tynrah ki kynthup ia kawei kaba don ia u Number ML 05 V 5339, ba shong da u Lamjingshai Kupar Nongbet na Mawlai Mawroh, bad ka ML 05 R 8515, ba shong da u Asif Wahlang na Laban.
Ha katei ka jingjia baroh ar tylli ki Scooty kila julor bad u Lamjingshai KUpar Nongbet u la mynsaw bad la pynkit sha Woodland Hospital.
Haduh da thoh ia kane ka khubor ym pat lapdien satia ia u nongniah jong ka kali EcoSport.
Katkum ka jingpynrung kyrteng hapoghka RTA la ong ba kane ka kali kadei jong Ruchir C Marak.
