Shillong, Risaw 14: Ka lympung ialehkai kriket ki jylla ka ri ba tip ia ka kum ka Ranji Trophy, kan wan ba kan iuh kjat biang hangne hapoh ka jylla, hadien ba ka kynhun ialehkai jong ka Meghalaya kin aireng pyrshah ia ka Mizoram, ha ka jingiakhun kaban sdang naduh lashai ka sngi ha madan ialehkai kriket ka MCA, ha Polo, kane ka jingiakhun kan sdang ha ka por 8:30 mynstep.
Ha kane ka kynti, u Kishan Lyngdoh u la dep ban shah jied ban long kum u nongialam ia ka kynhun, bad u vice captain ka kynhun un dei u Akash Kumar Chaudhary bad ia kane ka kynhun yn coach ia ka da u Moisten Ch Marak.
Katba u Ajay Duhan, sa shisien la jied biang ia u ban don bynta bad ka kynhun kum uwei na kita ki guest professional players ryngkat bad u Rahul Dalal ba la pdiang bad mynjur da ka BCCI, uba dei u batsman na Haryana, uba la don bynta lang bad ki kynhun ialehkai ki jylla ba dei ha ka thain shatei lam mihngi hadien ba u la mihkhmat teng ruh ia ka Arunachal Pradesh ha ka samoi ialehkai 2023-24.
Ha kane ka kynti, ia ka Meghalaya la pyniakap ia ka bad kiwei pat ki jylla ba kynthup ia ka Bihar, Arunachal Predesh, Sikkim, Manipur bad Mizoram, ha kaba artylli ki kynhun kiba ioh khur bun point na ka round robin kin khreh ban jam sha ka phainal ka plate group.
