Shillong, Naiwieng 09 : U Akash Choudhury ka Meghalaya, ula thaw history haka jingialehkai cricket bad long u rang ialehkai uba lai ban tied haduh 6 tylli ki six ha ka shi over hynne ka sngi U Blei kaba dei ka sngi ba-ar jong ka Ranji Trophy 2025-26 plate group pyrshah ia ka Arunachal Pradesh ha Surat.
Haba mih ban tied kum u rang ba phra, u Akash ula tied haduh 6 tylli ki six ha ka over u Limar Dabi, kaba la wan jia hadien ki history bala thaw da u Garry Sobers bad u Ravi Shastri. Nalor kane, ula thaw history ruh kum u nongtied ba kamai sted tam ia ka 50 runs ha ka jingialehkai test kaba long tang 11 bol.
Ka Meghalaya kala pynbna ban sangeh ia ka innings ba nyngkong da 628/6 hadien ba jop ia ka jingkynting pisa hynnin ka sngi bad jied ban tied nyngkong. Ka Arunachal haba wan tied, kala lah ban kamai tang 73 runs ha ka innings ba nyngkong bad ka hap ban pynbud ia ka innings kaba ar ha kaba kala lah ban tied 17/3, bad dang hap beh sa 524 run.
Lai ngut kiwei pat ki nongtied ka Meghalaya kila ialehkai bha ha kane ka jingiakhun bad kine ki dei u Arpit Bhatewara uba la ioh kamai 207 runs, Kishan Lyngdoh uba lah bankamai 119 runs bad u Rahul Dala uba lah ban kamai 144 runs.
Na ki nongkawang bol ka Meghalaya, u Aryan Borah ula shim haduh 4 wicket ba ai kamai 16 runs, u Dippu Sangma 2/16 bad u Aaron AR Nongrum 2/28 ha ka jingialehkai ba nyngkong eh jong u. U Swastic Chettri (1/3) bad u Akash (1/10) ruh ki dei kiba la ioh ban shim wicket.
Ki jingai khublei kila tuid na ki nongialam ka Meghalaya Cricket Association ba kynthup ia u President Nababrata Bhattacharjee, u Honorary Secretary Bah Rayonald Kharkamni, u Myntri Rangbah ka Jylla Conrad K Sangma bad kiwei kiwei.
