Shillong, Risaw 14: Ka Services kala pynrem iaka jylla Meghalaya da ka Innings bad 65 run ha ka Ranji Trophy 2024-25 kaba la long hynne ka sngi Nyngkong ha New Delhi.
Ka Meghalaya kala iakhun ha ka Elite Group A hadien ba kala wan baar ha ka Plate Group jong ka samoi kaba la dep bad kala shah pynrem noh ha ka Hyderabad. Kane kadei ka sien ka baar ia ka Meghalaya ban ioh rung sha ka Elite Group bad ka sien kaba nyngkong eh ba ka Meghalaya kala ioh rung haka Elite Group kadei ha ka samoi ialehkai jong u snem 2021-22.
Mynta ka kynti ka Meghalaya ka don ha ka Group A, kaba kynthup ia ka Services, Baroda, Jammu and Kashmir, Maharashtra, Odisha, Tripura bad Mumbai.
Ka jingiakhun ka Meghalaya pyrshah ia ka Services kala sdang ha sngi Thohdieng, ha kaba ka Meghalaya kala jied ban kawang bol nyngkong. Ki nongkawang bol ka Meghalaya kim shym la lah ban tehlakam ia ki nongtied jongka Services ha kaba u Ravi Chauhan ula ioh ban kamai 113 run bad u Rajat Paliwal ula ioh kamai 107 run bad ka Hyderabad kala kamai 402 run abd hap lut ki nongtied.
Ka Meghalaya kala leit ban tied ha ka sien kaba nyngkong bad kala kamai 233 run bad hadien kane ka Hyderabad kala ailad biang ia ka Meghalaya ban bteng ia ka jingtied hynrei ki nongialehkai ka Meghalaya kila kamai tang 104 run kaba la pynlong ia ka Hyderabad ban jop da 65 run bad khlem donkam shuh ban tied biang.
U Aryan Borah jong ka Meghalaya ula ioh 4 wiket bad ai 90 run, katba u Ajay Duhan ula ioh 3 wiket bad ai 11 run, u Dippu Sangma ula ioh 2 wiket bad ai 56 bad u Akash Kumar Choudhary ula ioh 1 wiket bad ai 93 run.
Ha ka jingleit tied ha ka sien kaba nyngkong ka Meghalaya kala hap dang kloi ia ki 5 wiket tang naka bynta 44 run u captain ka Meghalaya u Kishan Lyngdoh ula kamai 25 run na ki 27 bol. Katba u Sumit Kumar ula kamai 87 run bad u Anirudh B ula kamai 69 run bad u Akash uba la mih hadien ula kamai 23 khlem out bad ka Meghalaya kala kamai 233 run bad ka donkam sa 169 run.
Ka Meghalaya kala leit tied biang hynrei kala kamai tang 104 run bad hap lut ki nongtied hynrei u Dippu ula shong khlem tied shuh haduh ban da kut namar ka jingmynsaw.
Ka Meghalaya mynta kan wanphai noh sha la ka jong ka jylla ban pynkhreh ban iakhun pyrshah ia ka Tripura naduh ka 18 tarik u Risaw.
Ka Tripura kala iakhun nyngkong pyrshah ia ka Odisha ha Agartala hynrei ia kane ka jingiakhun la hap ban pynsangeh noh namar bad kumta kila ioh noh mar 1 point.
