Shillong, Rymphang 11: Ka Meghalaya hynne ka sngi u Blei kala ioh rung sha ka Final jong ka Ranji Trophy 2023-24 Plate Group bad kala pynskhem ruh ialade ban ioh jaka haka Elite Group kaban long ha ka samoi ban wan.
Ka Meghalaya kala pynrem iaka Mizoram haka semifinal hynne ka sngi ha ka jingiakhun kaba la long ha Mangaldai, Assam, da 6 wiket.
Ka Meghalaya kala donkam ban beh ia ka jingkamai 153 run ban ioh ia ka nam jingjop bad hynnin ka sngi kala Meghalaya kala kamai 125 run bad hap 4 wiket bad hynne ka sngi kala donkam sa tang 28 run ban jop.
U Kishan Lyngdoh bad u Jaskirat Singh Sachdeva kim shym la out bad kila bteng biang ban tied hynne ka sngi ha kaba u Kishan ula kamai 53 run bad ym shim la Out katba u Jaskirat ruh ula kamai 31 run khlem Out.
Ban shu pynkynmaw ka Mizoram kala leit tied nyngkong bad kala kamai 144 run bad ka Meghalaya kala kamai 145, ka Mizoram kala leit tied biang ha ka sien ka baar bad kala kamai 153 run.
U Aryan Borah bad u Akash Kumar Choudhury kila kawang bol bha naka bynta ka Meghalaya ha kaba u Aryan ula khur 10 wiket bad ula ioh ia ka khsunam Player of the Match katba u Akash ula ioh 8 wiket.
Ka Meghalaya kan iakhun pyrshah iaka Hyderabad ha ka Final kaban sdang naduh ka 17 tarik u Rymphang bad ia ka jaka ban pynialehkai ia Final yn sa pynbna kham hadien.
Ki nongialam kiba la rangbah jong ka Meghalaya Cricket Association kila ai khublei bad iaroh ia kane ka kynhun ialehkai cricket jong ka jylla halor ka jingseisoh ka jongki ha ka jingiakhun ha ka Ranji Trophy.
“Nga ai khublei ai ka kynhun kaba ialehkai ha ka Ranji kaba la ioh rung mynta sha ka Elite Group bad kan iakhun ia ka Final jongka Plate Group bad ka long ka rai kaba eh ban shim ban ym pynialehkai ia ki Guest Player ha katei ka lympung iakob kaba kongsan.” ong u President ka MCA u Nababrata Bhattacharjee.
“Kadei da ka jingshaniah skhem ha ki nongialehkai kiba la kha bad kiba la heh la san bad kila lehkai bha da kaba pynrung syndon sha ka Elite Group. U Kishan Lyngdoh, uba dei u kapten u jong ngi mynta ula shah peitkhmat ha ka ri namar ka jingialehkai bha ka jongu” ong u Naba.
“Ka jingjop mynta ka sngi ia ka Mizoram kadei kaba la thaw syndon ia ka histori jong ka jingialehkai cricket ha ka jylla, namar ha ka sien kaba nyngkong eh, ngin iakhun ia ka Final ha ka plate final bad ruh ban ioh rung sha ka Elite group jong ka Ranji Trophy kaban long ha ka samoi ban wan,” ong u Honorary Secretary ka MCA u Bah Gideon Kharkongor.
