Shillong, Kyllalyngkot 05: Ka Meghalaya kala ialehkai bha haka sngi sdang jongka jingiakhun iaka Ranji Trophy 2023-24 da kaba tam da 109 run iaka Arunachal Pradesh ha ka jingiakhun kaba la long hynne ka sngi Thohdieng ha Anand, Gujarat.
Ka Arunachal, kala leit ban tied nyngkong bad kala kamai tang 94 run ha ka 30 Over, kumta haba ka Meghalaya haba kala leit ban tied kala kamai 203 run bad hap tang 2 wiket ha ka 58 over.
Ka Meghalaya Cricket Association kala jied tang da ki nongialehkai kiba na ka jylla lajong bad kam shym la pynialehkai da ki Guest Player ne ki nongialehkai kiba sah ha kiwei pat ki jylla bad katei ka jingshim rai kadei kaban sah jingkynmaw haka histori ia kynun jong ka jylla.
Kila don tang 3 ngut ki nongtied ka Arunachal kiba la lah ban kamai run khambun, katba ki nongkawang bol ka Meghalaya kiba kynthup ia u Dippu Ch Sangma ula khur 4 wiket, u Sanvert Kurkalang ula shim 3 wiket, u Swarajeet Das ula shim 2 wiket bad u Md Nafees ula shim 1 wiket mar ia sdang bol ha ka over kaba nyngkong hi.
Kane ka long ruh ka sngi kaban sah jingkynmaw ia u Wicket Keeper ka Meghalaya u Arien Bonchang Sangma uba la ialehkai haka sien kaba nyngkong eh ha ka Ranji Trophy bad ula ioh pynhap ia ki 7 ngut ki nongtied ka Arunachal da kaba ioh kem (Catch) ia ka bol.
U Arien ula kamai ruh 32 run bad u Swarajeet 29 run, u Ram Gurung ula kamai 61 run bad u kapten Kishan Lyngdoh ula kamai 68 run bad kine baroh ar ngut kim pat Out satia.
