Shillong, Rymphang 09: U Aryan Borah jong ka Meghalaya ula shim 6 wiket ha ka sngi sdang jong ka Ranji Trophy plate group Semifinal ha ka jingiakhun pyrshah ia ka Mizoram kaba la long hynne ka sngi Thohdieng ha Mangaldai, Assam.
Ka Mizoram kala leit ban tied nyngkong bad kala kamai 144 run bad hap baroh ki nongtied katba ka Meghalaya kala kamai 115 run bad hap 5 wiket bad ka dang donkam sa 29 run ban beh ia kane ka jingkamai run ka Mizoram.
U Aryan ula ioh khur 12 wiket haka jingiakhun pyrshah bad ka Sikkim dangshen bad mynne ka sngi ula bteng biang ban ialehkai bha da kaba ioh khur haduh 6 wiket.
Katba u Akash Kumar Choudhury ula ioh 3 wiket bad ula ioh ban ula pynhap ruh ia u Agni Chopra uba la kamai 53 run bad u Chengkam Sangma ula ioh 1 wiket.
Haba ka Meghalaya kala leit ban tied, u Dippu Sangma ula kamai 24 run, u Kishan Lyngdoh ula kamai 32 run katba u Jaskirat Singh Sachdeva ula kamai 10 run bad Swarajeet Das 3 run bad kine baroh ar ngut kim pat out satia bad lashai ka sngi ka Meghalaya kan bteng biang ban tied.
Ka Meghalaya kala pynmih madan tang da ki nongialehkai kiba sah hapoh ka jylla ha ka Ranji Trophy bad kine ki nongialehkai kila lah ban ialehkai bha ha kane ka jingiakob.
