Shillong, Nailur 17: Ka Myntri ka koit ka khiah ka Kong Ampareen Lyngdoh, hynne ka sngi Baar, kala kyntu ia ka kynhun niam Hindu ba kan pynkut noh iaka drama politics da kaba pynbna ba ka masi kadei ka kmie jong ka ri India ne ka “Mother of India” bad ban khang noh ia ka jingshoh doh ia ki masi.
Hynrei kala kyntu ba dei ban don ia ka jingiaburom mar kylliang hapdeng ki jaidbynriew bad kala kyntu ia kawei pa kawei ka kynhun ba ki dei ban burom ia ka riti tynrai bad ia ka jingngeit ka jongki kumba ki burom ia la ka jong, khnang ba ka ri India kan neh kum kata ka ri synshar paidbah kaba khlain.
Ka Jagatguru Shankaracharya Swami Avimukteshwarananda Saraswati kala tyrwa ban pynlong ia ka ‘jingiaid paidbah ban iada ia ka masi’ ha nongbah Shillong ha ka 2 tarik u Risaw, kaba la mih ka jingpyrshah na kiba bun ki liang ha ka jylla Meghalaya.
Ha kaba iadei bad jingkyrpad jong kane ka kynhun Hindu ban pynlong ia ka Yatra, ka Kong Ampareen kala ong ba ka Meghalaya ka don iala ka jong ka kolshor kaba kyrpang bad kumta ym dei ban ailad ba ki bor kiba nabar ba kin wan ban tuklar.
Kala byrngem ba kano kano ka jingleh ne ki jingthmu ban pynthud ia ka suk ka sain ka dei kaba ym lah ban pdiang bad kila don lypa ki ain ki ban shimkhia ia kum kitei ki jingpynthud.
Ka Kong Ampareen kala ong, ba ka Meghalaya ka dei ka jylla kaba shongsuk kaba don ia la ka jong ka kolshor bad ka riti dustur tynrai bad kano kano ka jingthmu ban pynpait pynpra ne pyniashun dei ban tehlakam namar kine ki drama politik ym dei ban ailad ban ktah iaka shongsuk jong ki paidbah ka jylla Meghalaya.
